• Era sindica d’Aran a adreçat ua carta ara conselhèra de Presidéncia dera Generalitat entà convocar ua amassada dera Comission Bilaterau entre andús govèrns abans de finalizar er an entà tractar ahèrs de transendéncia entà Aran coma eth plan de dubertura d’activitats e es sues afectacions sus eth territòri, atau coma d’auti coma era sanitat o era lengua

Era sindica d’Aran, Maria Vergés, s’a adreçat ara conselhèra de Presidéncia dera Generalitat de Catalunya, Meritxell Budó, entà sollicitar ua amassada dera Comission Bilaterau des govèrns dera Generalitat e eth Conselh Generau d’Aran, atau coma establís era Lei 1/2015 de Regim Especiau d’Aran, que ditz qu’aguesta comission s’a d’amassar aumens un còp ar an.

“En aguesti moments, tot e qu’era Comission s’amassèc en mes de gèr, son diuèrsi es ahèrs d’interès e transendéncia entà Aran que requerissen poder tractar-se en aguest ens abans d’acabar er an”, afirmaue era sindica d’Aran, en tot híger que: “ei pr’amor d’açò qu’auem sollicitat poder amiar a tèrme ua amassada d’aguesta Comission Bilaterau”.

Deuant era publicacion des mesures deth plan de dubertura d’activitats dera Generalitat, era sindica d’Aran a manifestat que: “ei de besonh qu’aguestes decisions qu’afècten de forma tan dirècta ath nòste territòri siguen consensuades damb eth govèrn deth Conselh Generau d’Aran”. En aguest sens, Vergés ja hec arribar aguesta setmana ua carta ath conselhèr d’Interior dera Generalitat, Miquel Sàmper, entà sollicitar qu’eth Conselh Generau forme part deth PROCICAT, de forma qu’era Val d’Aran pogue participar ena prenuda de decisions e pogue hèr arribar atau era realitat dera singularitat aranesa e deth sòn autogovèrn.

Totun, era sindica d’Aran a insistit en besonh de “seguir es mesures de seguretat establides pes autoritats competentes entà arténher baishar eth risc de rebròt en territòri, entà poder assegurar, en base as mesures establides, que se pogue amiar a tèrme era tempsada toristica d’iuèrn”

Ath delà, en aguesta Comission Bilaterau s’aurien de tractar tanben ahèrs primordiaus e transcendents entath govèrn deth Conselh Generau d’Aran coma ei er estat deth sistèma sanitari aranés, especiaument en aguesti moments de pandèmia, e tanben d’auti relacionadi damb era lengua pròpria d’Aran e es espòrts.