• Era sindica d’Aran a sollicitat ua amasssada damb eth nau conselhèr d’Interior entà tractar, entre d’auti ahèrs urgents entara Val d’Aran, eth recors contenciós qu’eth Conselh Generau d’Aran presentèc deuant eth departament d’Interior per incompliment der Acòrd Institucionau de gestion integrau d’emergéncies en territòri, e cercar conjuntament vies de solucion ad aguest conflicte

Era sindica d’Aran, Maria Vergés, s’a dirigit per carta ath nau conselhèr d’Interior dera Generalitat de Catalunya, Joan Ignasi Elena, entà sollicitar ua entrevista damb eth e tractar, entre d’auti ahèrs urgents entara Val d’Aran, er incompliment der Acòrd Institucionau de gestion integrau d’emergéncies en Aran, aprovat en an 2019 pera Comission Bilaterau Generalitat- Conselh Generau.

Er apartat 5 dera clausula 11 d’aguest acòrd de collaboracion determine que “pendent eth periòde de transicion entara implementacion deth modèl de gestion integrau d’Emergéncies per part deth Conselh Generau d’Aran, eth departament d’Interior aportarà es veïculs de besonh entath servici des Pompièrs d’Aran d’acòrd damb es critèris generaus qu’era Direccion Generau de Prevencion, Extincion d’Incendis e Sauvaments aplique entà distribuir e destinar es veïculs des Bombers dera Generalitat de Catalunya entre es diferents parcs de Catalunya. Enquiara finalizacion d’aguest periòde de transicion, eth 31 de deseme de 2022, es veïculs que s’incorpòren ath servici des Pompièrs d’Aran seràn aqueridi peth departament d’Interior”.

En aguest sens, era sindica d’Aran, manifèste ath conselhèr que: “dempús de mès d’un an de negociacion e debat damb eth vòste predecessor entà balhar compliment ad aguest acòrd,  eth departament d’Interior mantenguec era sua negativa a dotar de veïculs ath còs de Pompièrs d’Aran, atau e coma contemple er acòrd signat e coma s’a amiat a tèrme en d’auti parcs de pompièrs depenents dera Generalitat”. Deuant d’aguesta negativa, explique era sindica, “eth Conselh Generau d’Aran prenec era determinacion d’interposar un recors contenciós administratiu, presentat eth passat 12 de junhsèga, per incompliment d’aguest acòrd institucionau”.

“Entath govèrn d’Aran aguesta non a estat ua decision agradiua de préner, mès consideram qu’era seguretat des nòsti professionaus, atau coma era garantia e efectivitat des servicis d’emergéncies se trapen nautament comprometudi per aguest ahèr e ei eth nòste déuer e obligacion velhar per aguest prètzhèt”, assegure Vergés, que hig que: “totun, ei volontat deth govèrn qu’entèsti, trapar vies de solucion ad aguest conflicte basades ena leiautat e respècte institucionau e damb er objectiu de garantir ua gestion des emergéncies de qualitat en nòste territòri, e tanben ena rèsta de territòris vesins enes qu’eth còs de Pompièrs d’Aran balhe supòrt damb regularitat. Atau l’ac trasladè ath pròpri president dera Generalitat pendent era sua visita entara Val d’Aran, e ara conselhèra dera presidéncia, damb qui auem tractat es ahèrs a debàter ena pròplèu comission bilaterau Conselh Generau d’Aran-Generalitat de Catalunya”.

Pr’amor d’aguest e d’auti ahèrs tanhents ath departament d’Interior en relacion damb eth govèrn aranés, s’a sollicitat ua amassada ena que poder tractar aguesti prètzhèts.