• Era sindica d’Aran a demanat ua amassada damb era ministra de Transpòrts, Mobilitat e Agenda Urbana entà poder tractar sus era N-230 e es estudis de pas dera futura naua variant entre era boca nòrd deth tunèl de Vielha e era termièra damb França

Era sindica d’Aran, Maria Vergés, s’a adreçat ara ministra de Transpòrts, Mobilitat e Agenda Urbana, Raquel Sánchez, entà sollicitar ua amassada damb era ena que poder  tractar eth futur condicionament dera N-230, ua via de grana trascendéncia entara Val d’Aran.

“Era N-230  compde damb un long e complèxe istoriau estant considerada, de hè fòrça ans, coma ua des vies damb major taxa d’accidents de tota Espanha”, manifèste era sindica d’Aran ena missiva dirigida ara ministra Sánchez, en tot afirmar tanben que: “ad aguesta situacion cau híger que, damb eth pas deth temps, era carretèra a anat incrementant era sua importància coma via de comunicacion damb França a trauès dera Val d’Aran, sustot en çò que tanh ath transpòrt de mercaderies e trafic pesat, çò que compòrte eth pas d’ua mejana de cinc cents camions diaris per aguest tram”.

En aguest sens, cau rebrembar que hè uns ans, eth govèrn der Estat aprovèc dejà provisionaument un estudi informatiu que siguec sometut a informacion publica e deuant eth quau eth Conselh Generau d’Aran, era Generalitat de Catalunya, era Deputacion de Lleida e es ajuntaments aranesi presentèren allegacions conjuntes en considerar qu’es opcions deth traçat non èren es mes adequades, non s’ajustauen ath territòri e non se minimizauen es impactes païsatgistics e socioeconomics d’un territòri coma era Val d’Aran.

“Deth govèrn deth Conselh Generau d’Aran ençà mos cònste qu’actuaument non s’amie a tèrme cap estudi ne analisi ath respècte, mès sabem qu’existís un compromís per part deth Ministèri entà realizar es estudis de pas dera naua variant entre era boca nòrd deth tunèl de Vielha e era termièra damb França”, explique era sindica, que hig que: “per aguest motiu, è demanat tanben ath Secretari Generau entath Rèpte Demografic, Francés Boya, que auance ara ministra era informacion d’aguest ahèr, entà podé-i mantier ua  amassada ena que pogam tractar aguesta problematica qu’ei de vitau importància, non sonque entara Val d’Aran, senon entà toti es territòris que trauèsse aguesta carretèra”.