• Eth govèrn deth Conselh Generau d’Aran vò establir, damb era major brevetat possible, ua relacion bilaterau damb eth govèrn dera Generalitat entà, per un costat, daurir un nau cicle basat en respècte e era leiautat institucionau e, per un aute, afrontar es rèptes e projèctes de futur qu’era Val d’Aran aurà d’afrontar enes pròplèu ans

Era sindica d’Aran, Maria Vergés, a adreçat ua carta de felicitacion ath nau president dera Generalitat de Catalunya, Pere Aragonès, ena qu’a profitat tanben entà  entà transmeter-li era volentat d’encetar ua naua etapa en çò que hè ara relacion entre eth govèrn deth Conselh Generau d’Aran e era Generalitat.

“Malerosament, pendent es darrèri ans, era relacion entre andús govèrns non a estat tant floïda e dinamica coma serie desirable”, afirme era sindica ena missiva, en tot híger que: “ei pr’amor d’açò que, un viatge constituït eth nau govèrn dera Generalitat de Catalunya, ei eth nòste desir e era nòsta volontat encetar ua naua etapa damb er executiu catalan, a on pogam daurir vies de dialòg e consens, dera leiautat e respècte institucionau ençà, entà hèr front a toti es rèptes qu’eth nòste territòri a per endauant”.

En aguest sens, era sindica a transmetut tanben ath president era demana “qu’era figura qu’ocupe era secretaria de relacions damb Aran pogue èster ua persona consensuada damb eth Conselh Generau d’Aran, e que sigue quauquarrés coneishedor dera realitat aranesa e dera administracion dera Generalitat, entà atau poder contribuïr, de forma efectiva, a arténher toti aqueri objectius indispensables entara maxima institucion aranesa e tara ciutadania d’Aran”.

Atau madeish, eth govèrn aranés a previst tanben sollicitar entrevistes damb es diuèrses conselheries dera Generalitat entà tractar sus es ahèrs concrèts de cadua d’eres en relacion as competéncies deth Conselh Generau d’Aran.