• Aguest matin era sindica d’Aran a mantengut ua trobada telematica damb es grops politics deth Parlament de Catalunya entà explicar-les era intencion deth govèrn d’Aran de presentar en brèu ua iniciativa legislativa entà modificar era Lei 8/2022 sus er emplec e aprenedissage des lengües oficiaus en ensenhament non universitari, qu’elimine eth caractèr de lengua veïculara der aranés ena escòla e entà demanar-les era sua complicitat en aguesta qüestion

Era sindica d’Aran, Maria Vergés, s’a amassat telematicament damb es grops parlamentaris deth Parlament de Catalunya aguest maitin entà tractar sus era iniciativa legislativa qu’era maxima institucion aranesa presentarà en Parlament tà exigir era modificacion dera Lei 8/2022 sus er emplec e aprenedissage des lengües oficiaus en ensenhament non universitari, qu’elimine eth caractèr de lengua veïculara der aranés.

“En aguesta amassada è expausat as grops parlamentaris quina ei era situacion actuau dera nòsta lengua, qu’a dia d’aué non arribe a un 20% d’emplec sociau, se trape infrafinançada e es competéncies deth Conselh Generau d’Aran en aguest airau son laminades e compartides damb era Generalitat” explicaue era sindica d’Aran, e higie que :”per aguest motiu, è sollicitat era sua collaboracion en aguest airau e eth sòn vòt favorable ara iniciativa legislativa que presentaram en Parlament entà garantir era seguretat juridica de besonh en aguesta qüestion”.

Eth passat 8 de junhsèga, eth Plen deth Conselh Generau d’Aran dejà aprovèc per unanimitat, e damb eth supòrt explicit deth sector educatiu aranés, era declaracion institucionau presentada per equip de govèrn entà exigir ara Generalitat de Catalunya e ath Parlament de Catalunya era modificacion d’aguesta Lei, e s’anoncièc que se presentarie ua iniciativa legislativa en Parlament tà exigir era modificacion immediata d’aguesta qüestion.

Era sindica d’Aran a volut arregraïr era predisposicion des grups parlamentaris a escotar e trobar ua solucion ara actuau situacion qu’a portat, entre d’autes qüestions, a qu’es instruccions qu’eth departament d’Educacion a hèt a arribar as escòles araneses mèrquen qu’era lengua veïculara des centres educatius en Aran sigue eth catalan.

Ena amassada i an prenut part representants des grups d’ERC, PSC, JxCat, En Comú Podem, CUP, C’s e Vox, atau coma membres dera Oficina d’Aran en Parlament e un des letrats dera cramba catalana.