• Era passada setmana, era sindica d’Aran e es alcaldes de Les e de Bossòst visitèrn, d’un costat, era Residéncia Sant Joan de Les, que dempús d’auer auut d’amiar a tèrme es estudis de viabilitat tecnica e economica qu’en un prumèr moment non s’auien realizat, auer redefinit eth projècte e redigit un plan foncionau e de gestion, eth govèrn d’Aran prevé daurir a finaus d’aguest an dempús d’ues òbres tà realizar petites modificacions laguens dera bastissa, era crompa de mobiliari e ua reurbanizacion der entorn dera Residéncia

• D’un aute costat, visitèren es parcs de Pompièrs deth Baish Aran, a on eth Conselh Generau d’Aran amièc a tèrme ua sèria d’actuacions entà melhorar era foncionalitat des espacis e garantir era seguretat e benèster deth còs de Pompièrs en aguesti espacis

• En darrèr lòc, visitèren tanben eth Castèth de Pijaoèrt e era bastissa dera aubèrja Matacabòs, a on eth Conselh Generau d’Aran collabòre damb er Ajuntament de Les entà amiar a tèrme trabalhs de melhora e manteniment damb er objectiu de méter en valor e dinamizar sociau e economicament eth municipi

Era sindica d’Aran, Maria Vergés, acompanhada pes alcaldes de Les e de Bossòst, Andreu Cortés e Amador Marqués, visitèc era passada setmana es òbres a on eth govèrn deth Conselh Generau d’Aran desvolòpe projèctes importants entath Baish Aran.

En cas de Les, visitèren era Residéncia Sant Joan de Les, qu’eth govèrn aranés demore poder daurir a finaus d’aguest an 2023. Eth projècte d’aguesta Residéncia s’inicièc ena passada legislatura, mès non compdaue damb cap estudi de viabilitat tecnica ne economica qu’auesse en compde es besonhs reaus deth territòri en aguest airau, ne tanpòc se compdèc damb partida pressupostària entà equipament e mobiliari.

A despièch dera manca de criteri tecnic damb eth que impulsèc er equipament e es retards que s’an patit pr’amor dera situacion sanitària e sociau, eth govèrn d’Aran a artenhut redefinir eth projècte e redigir un plan foncionau e de gestion, que non s’auien realizat, que permeteran qu’era Residéncia Sant Joan esdevengue un espaci que pogue acuélher as sòns usatgèrs e usatgères damb totes es garanties. Aguesta primauera s’iniciaran ues òbres tà realizar petites modificacions laguens dera bastissa, se licitarà era crompa de mobiliari e s’amiarà a tèrme ua reurbanizacion der entorn dera Residéncia.

Visitèren tanben es parcs de Pompièrs de Les e Bossòst, a on eth govèrn deth Conselh Generau d’Aran amièc a tèrme ua sèria d’actuacions entà melhorar era foncionalitat des espacis e garantir era seguretat e benèster deth còs de Pompièrs en aguesti espacis.

En darrèr lòc, visitèren tanben eth Castèth de Pijaoèrt, a on eth Conselh Generau d’Aran collabòre damb er Ajuntament de Les entara sua metuda en valor damb un convèni de 125.000 €. Era melhora e mantenement d’aguest conjunt istoric ajudarà a méter en valor eth nòste auviatge culturau e dar a conéisher ua part dera nòsta istòria.