• Era sindica d’Aran a inciat aué ua sèrie de visites as terçons dera Val d’Aran e, acompanhada peth conselhèr Josep Canut, a visitat es terçons de Pujòlo e Arties e Garòs, a on s’a amassat damb er alcalde de Naut Aran e era presidenta dera EMD d’Arties e Garòs, e s’a entrevistat damb es ciutadans e ciutadanes qu’auien demanat ora entà expausar-les diuèrsi ahèrs. Pendent era visita a recebut tanben as alumnes de prumèr e dusau de primària dera Escòla Ruda de Salardú.

Era sindica d’Aran, Maria Vergés, a iniciat aué era ronda de visites as terçons dera Val d’Aran en tot visitar Pujòlo e Arties e Garòs, acompanhada peth conselhèr d’Economia, Torisme e Promocion Economica, Josep Canut. Pendent aguestes visites, s’a amassat damb er alcalde de Naut Aran, Cesar Ruiz-Canela, e era presidenta dera EMD d’Arties e Garòs, Lina Fanlo, damb qui an tractat diuèrsi ahèrs importants entàs sòns parçans. Era sindica a recebut as ciutadans e ciutadanes que prèviament auien demanat cita entà entrevistar-se damb era entà expausar ahèrs deth sòn interès. Atau madeish, tanben a recebut era visita des mainatges e mainades de prumèr e dusau de primària dera Escòla Ruda de Salardú, que prèviament auien trabalhat en un projècte educatiu qué ei eth Conselh Generau d’Aran, per qui ei format e quina ei era figura dera sindica.

Era sindica e eth conselhèr, acompanhadi per alcalde de Naut Aran e es presidents des EMD de Bagergue e Unha, Marc Tarrau e José Paba, an profitat entà visitar diuèrses òbres e actuacions qu’eth Conselh Generau d’Aran amie a tèrme en municipi, coma ei eth cas deth projècte de melhora deth campanau dera Glèisa de Salardú o es trabalhs de melhora deth tram dera pista de Varradòs que va de Bagergue ath Saut deth Pish.

Entara sindica d’Aran aguestes visites an er objectiu d’apropar era institucion ara ciutadania e s’a mostrat “plan satisfèta damb aguesta prumèra ronda de visites as terçons, que mos a servit entà conéisher er estat des trabalhs qu’eth Conselh Generau amie a tèrme, atau coma entà meter-mos a disposicion des vesins e vesies d’aguesti pòbles, atau coma des sòns representants locaus e escotar es sues prepauses e besonhs”. En aguest sens era sindica a volut “arregraïr era acuelhuda der alcalde de Naut Aran e des presidents des EMD, atau coma era volontat de collaboracion entre aguestes institucions”.