• Eth mes de març de 2022, er Espitau Val d’Aran implementèc es audiometries telematiques damb especialistes deth Hospital del Mar, ua tecnica pionèra que permet revisar era capacitat auditiva des pacients en nòste territòri a trauès deth servici d’Otorrinolaringologia deth Hospital del Mar, en tot estauviar atau desplaçaments dehòra d’Aran

• Es audiològues deth Hospital del Mar presentèren en darrèr Congrès Nacionau d’Audiologia aguest modèl de tele-audiometria, qu’arrecebec ua notòria acuelhuda per part des presents pr’amor que facilite era accessibilitat en territòris ruraus coma eth nòste

Es audiològues deth Hospital del Mar, Julieta Nahir de Ochoa e Rosa Maria Sabater, presentèren en darrèr Congrès Nacionau d’Audiologia en Madrid era aliança entre er Espitau Val d’Aran e eth Hospital del Mar entara realizacion dera audiometria a distància, qu’arrecebec ua notòria acuelhuda per part des presents pr’amor que facilite era accessibilitat a pròves especializades d’audiologia en un espitau de tresau nivèu coma eth nòste.

Deth mes de març de 2022 ençà, es pacients d’Aran, gràcies ath supòrt balhat pera equipa d’infermeria d’Aran Salut, pòden hèr-se es examens d’audiologia en comunicacion a temps reau damb es audiològs expèrts deth Hospital del Mar de Barcelona.

“Deth govèrn d’Aran estant trabalham de hè fòrça temps entà melhorar ath maxim eth nòste sistèma assistenciau integrat entà balhar as aranesi e araneses era melhor atencion possible” asseguraue era sindica d’Aran, Maria Vergés, en tot híger que: “gràcies a aliances coma era que mantenguem damb eth Hospital del Mar e ara implementacion des naues tecnologies, artenhem melhorar e ampliar era nòsta cartèra de servicis, en tot facilitar era comoditat e atencion as pacients deth nòste Espitau”.

Era presentacion d’aguest modèl de tele-audiometries desvelhèc en aguest congrès er interès per implementar aguest innovador sistèma de pròves telematiques entre d’auti centres de salut en endrets aluenhats geograficament.

Era equipa d’infermeria d’Aran Salut formada per Maite Cortés Boya, infermièra deth gabinet de pròves, e Pilar Cos, directora d’Infermeria d’Aran Salut, participèren coma coautores dera exposicion que defensèc era audiològa Nahir de Ochoa.

“Deth Conselh Generau d’Aran ençà volem méter en valor er excellent trabalh realizat, autant per part des nòsti professionaus coma des deth Hospital del Mar, entà hèr possible qu’era tele-audiometria ja age complit un an de foncionament damb uns resultats fòrça positius”, destacaue era sindica d’Aran, afirmant que: “des nòsti Servici Assistenciaus Integrats ençà contunharam balhant supòrt entà promòir qu’es nòsti professionaus participen en eveniments restacadi damb era innovacion e era investigacion”.