Era UME realize trabalhs de neteja e desinfeccion en punts clau ena Val d’Aran

Dempús dera demana deth Sindic d’Aran dera pasada setmana, ua unitat dera UME s’a desplaçat de Saragossa estant entà amiar a tèrme era neteja e desinfeccion de diuèrsi airaus, entre eri era Residéncia Sant Antòni, zònes comuns der Espitau Val d’Aran e es consultòris locaus

Pendent aguesti dies 33 efectius dera Unitat Militar d’Emergéncies (UME) seran en Aran entà realizar trabalhs de neteja e desinfeccion en diuèrsi punts clau deth nòste territòri.

Atau donc, actuaran ena Residéncia Sant Antòni, en Espitau Val d’Aran, enes consultòris locaus e accèssi a espaci publics damb nauta afloéncia de gent.

Eth Sindic d’Aran a manifestat “er arregraïment deth govèrn deth Conselh Generau d’Aran pera ajuda facilitada pera UME e pera sua disponibilitat en aguesti moments de dificultat”.