• Eth Comitat Espanhòl deth programa MaB a aprobat era candidatura dera Val d’Aran coma Resèrva dera Biosfèra impulsada peth Conselh Generau d’Aran e l’a remetut ath Comitat Scientific d’aguest programa ena UNESCO entara sua aprobacion definitiva

• Aguest projècte a coma principaus objectius promocionar eth desvolopament economic, sostenible e der auviatge culturau e naturau qu’aufrís eth territòri e plaçar Aran laguens der hilat internacionau des Resèrves dera Biosfèra dera UNESCO

• Entara sua redaccion, eth Conselh Generau d’Aran compdèc damb eth supòrt d’un important nombre d’administracions publiques e empreses deth territòri e siguec dubèrt ath debat e participacion dera societat aranesa

Eth Comitat Espanhòl deth Programa Òme e Biosfèra (MaB) a aprovat era candidatura dera Val d’Aran coma Resèrva dera Biosfèra impulsada peth Conselh Generau d’Aran e l’a remetut ath Comitat Scientific deth Programa MaB dera UNESCO entara sua aprobacion definitiva.

Pendent es darrèri ans, eth Conselh Generau d’Aran a trabalhat, damb eth supòrt e assessorament des expèrts de Verd e Blu e Inèdit, en procés de dessenh e redaccion dera candidatura dera Resèrva dera Biosfèra dera Val d’Aran. Aguest trabalh a compdat tanben damb  eth supòrt d’administracions publiques e empreses deth territòri, atau madeish com damb era participacion dera ciutadania en aguest procès.

“Formar part der hilat internacionau des Resèrves dera Biosfèra serie ua grana oportunitat entara Val d’Aran, pr’amor que supausen figures de promocion e reconeishement que poténcien e meten en valor es particularitats dera zòna” asseguraue era sindica d’Aran, Maria Vergés, e higie que: “qu’Aran esdevengue Resèrva dera Biosfèra supausarà un rèpte entà arténher ua gestion sostenibla deth territòri adaptada as rèptes ambientaus, sociaus, territoriaus e economics ”.

Aran pòt postular-se coma laboratòri viu pes valors singulars que mos diferéncien coma era nòsta realitat nacionau damb personalitat pròpria, eth nòste autogovèrn, era nòsta situacion coma territòri de termièra, eth nòste patrimòni culturau, lingüistic e tradicionau o es nòstes valors naturaus, entre d’auti.

En aguest sens, era sindica d’Aran afirmaue que: “era Val d’Aran pòt esdevier un parçan a on experimentar e definir naui modèus territoriaus sostenibles e resilients” e higie que “un des principis basics d’aguest laboratòri viu serie potenciar era dinamizacion e reactivacion des sectors socioeconomics deth territòri, autant innovadors coma tradicionaus, en tot traccionar atau eth modèu economic desirat per tota era ciutadania e a on s’includisquen es nòsti valors patrimoniaus”.