• Pendent es dies 10 e 19 de març, ueit restaurants aranesi aufriràn un menu exclusivament dessenhat entà dar protagonisme ath Caviar Nacarii, a trauès d’uns plats que meten en valor aguest ingredient, atau coma era subergessenta gastronomia deth nòste territòri

Eth Conselh Generau d’Aran, a trauès de Foment Torisme Val d’Aran, e Caviar Nacarii organizen ua naua edicion des Jornades Gastronomiques deth Caviar Nacarii, damb era collaboracion deth Grèmi d’Ostalaria dera Val d’Aran.

Pendent es dies 10 e 19 de març, ueit restaurants aranesi aufriràn un menu dessenhat exclusivament entà dar protagonisme ath caviar aranés a trauès d’uns plats que meten en valor aguest ingredient, atau coma era subergessenta gastronomia deth nòste territòri.

“Eth Caviar Nacarii ei un producte que da fòrça prestigi ara Val d’Aran e que mos diferéncie dera rèsta de territòris de montanha pr’amor qu’ei un producte totaument exclusiu e fòrça ben valorat”, afirme eth conselhèr d’Economia, Torisme e Promocion Economica, Josep Canut, que hig que: “aguest producte ajude a diversificar era ofèrta dera zòna, en tot ampliar es opcions gastronomiques dera gent que mos visite e que cerque diferentes alternatives”.

Boixetes de Cal Manel, eth Parador d’Arties, Hotel MIM Baqueira, Era Lucana, Es Arraïtzes, Era Coquèla, Roc’N’Cris e Coto Marzo son es restaurants a on se poderà gaudir d’aguestes jornades gastronomiques tant especiaus e, ath delà, se poiràn realizar cates en Espaci Gastronomic Caviar Nacarii.

“Cau destacar eth gran trabalh de maridatge qu’amien a tèrme es ueit restaurants que participen en aguestes jornades, en tot crear un menu especiau que met de manifèst eth naut nivèu gastronomic deth nòste territòri e que, de ben segur, non deisharà indeferent as persones que s’apròpen a tastar es sòns plats” asseguraue eth conselhèr Canut.

Ath delà, enguan coma nauetat, es persones que compartisquen es imatges des plats consumits pendent aguestes jornades a trauès de Instagram, en tot etiquetar a Caviar Nacarii, Val d’Aran e eth restaurant a on se consumisque eth plat fotografiat, en tot emplegant eth hashtag #JornadesCaviarNacarii2023 poiràn participar en sorteig de tres prèmis exclusius: ua lhauna de Caviar Nacarii, ua cistalha de productes dera Marca de Garantia e un menú entà dues persones en un des ueit restaurants que participen enes jornades!