• Pendent es dies 7 e 20 de març, nau restaurants aranesi aufriràn un menú exclusivament dessenhat entà dar protagonisme ath Caviar Nacarii, producte etiquetat damb eth sagèth de Marca Garantia dera Val d’Aran

Caviar Nacarii e eth Conselh Generau d’Aran, damb era collaboracion deth Grèmi d’Ostalaria dera Val d’Aran, organizen, un an mes, ua naua edicion deth Mes deth Caviar.

Pendent aguestes jornades gastronomiques, nau restaurants aranesi aufriràn un menú exclusivament dessenhat entà dar protagonisme ath Caviar Nacarii a trauès d’uns plats que meten en valor aguest exclusiu ingredient.

Casa Pau, Lits, Otèl MIM Baqueira, Cal Manel, La Baraque del Ciervo Gastrobar, eth Parador d’Arties, Es Arraïtzes, El Raconet e Era Coquela son es restaurants a on se poderà gaudir d’aguesti menús especiau pendent es dies 7 e 20 de març.

“Eth Caviar Nacarii ei un producte que da fòrça prestigi ara Val d’Aran e que mos diferéncie dera rèsta de territòris de montanha pr’amor qu’ei un producte totaument exclusiu”, afirme eth conselhèr d’Economia, Torisme e Promocion Economica, Josep Canut, que hig que: “aguest producte ajude a diversificar era ofèrta dera zòna, en tot ampliar es opcions gastronomiques dera gent que mos visite e que cerque diferentes alternatives”.

Cau destacar qu’eth caviar Nacarii ei un producte etiquetat damb eth sagèth de Marca Garantia dera Val d’Aran, un sagèth que compde damb eth supòrt dera Deputacion de Lleida, a trauès deth sòn convèni de promocion economica damb eth Conselh Generau d’Aran.