-
250 persones vengudes de tota Espanha gaudiràn de 20 rutes pes montanhes mès emblematiques dera Val d’Aran
-
Pes tardes, dempús des gessudes, eth poliesportiu de Salardú acuelherà un programa de conferéncies e projeccions sus seguretat
Era Val d’Aran acuelherà a compdar deth dia 25 d’agost eth Campament dera Federacion Espanhòla d’Espòrts de Montanha e Escalada (FEDME), qu’enguan celèbre era sua 73au edicion.
Pendent ua semana, mès de 250 federats damb licéncia abilitada FEDME 2019 venguts de tota Espanha, gaudiràn de vint rutes de senderisme pes montanhes mès emblematiques dera Val d’Aran acompanhadi en tot moment d’un equip de guides de montanha.
Damb aguestes rutes es participaires poiràn conéisher lòcs coma eth Montardo, era Artiga de Lin, es Lacs de Colomèrs o eth Montcorbison, entre d’auti. Ath delà, cada ser auràn era oportunitat d’hèr observacion astronomica en parcatge 1500 de Baqueira.
Pes maitins se realizaràn es gessudes e pes tardes aurà lòc en poliesportiu de Salardú un programa de conferéncies e projeccions. I aurà intervencions per part dera FEDME en matèria de seguretat, eth geòleg responsable deth Centre de Lauegi d’Aran, Jordi Gavaldà, parlarà tanben sus seguretat en iuèrn e sus es lauegi e es frairs Pou parlaràn sus es sues darrères escalades nacionaus e per tèrres americanes.
Ath delà, era fabrica REFU de bières artesanaus dera Val d’Aran aufrirà tanben ua cata des sòns productes.
Entre es activitats previstes en aguest campament, non se desbremben pas des mès petits! I a un Campament Infantil, dirigit per monitors especializats, a on es mainatges e mainades inscrits realizaràn tot tipe d’activitats restacades damb era natura e er espòrt adaptades ara sua edat.
Fin finau, eth dissabte, 31 d’agost, toti es participaires realizaràn amassa ua marcha popular pes pòbles deth Naut Aran, qu’acabarà damb un dinar en Salardú coma barrament d’aguesta 73au edicion deth Campament FEDME.
Aguest eveniment ei organizat pera FEDME, eth Club Alpí Aranès e era enterpresa Camins e patrocinat peth Conselh Generau d’Aran, Foment Torisme Val d’Aran e er Ajuntament de Naut Aran. Compde tanben damb era collaboracion der Ajuntament de Vielha e Mijaran, Baqueira-Beret, Taüll Organics e d’autes entitats e enterpreses araneses.
