Un totau de 15 Atenèus, distribuïdi per tota Catalonha, favoriràn era creacion d’empreses d’economia sociau e cooperatiua, atau coma era viabilitat e sostenibilitat des projèctes e experiéncies existentes en territòri entà melhorar era aucupacion en tot impulsar era creacion de naui lòcs de trabalh, en especiau es de qualitat, e eth desvolopament deth territòri.

Eth Departament de Trabalh, Ahèrs Sociaus e Familhes dera Generalitat de Catalonha destine 3.300.000 èuros ath nau projècte entà subvencionar es iniciatiues d’Atenèus que presenten es entitats sollicitants.

Eth vicesindic d’Aran e conselhèr d’Administracion Publica, Finances e Coneishement e Transparència, Luis Carlos Medina, eth director des Servicis Territoriaus de Trabalh, Ahèrs Sociaus e Familhes en Lleida, Joan Santacana, e eth director generau d’Economia Sociau, eth Tresau Sector, es Cooperatives e Autoempresa, Josep Vidal, an presentat aué ena sedença deth Conselh Generau d’Aran eth nau projècte de creacion deth Hilat d’Atenèus Cooperatius, un hilat d’entitats qu’eth Departament vò que sigue un servici de referéncia a on es organizacions cooperatives e d’economia sociau trabalhen amassa entà crear e impulsar naui lòcs de trabalh, en especiau es de qualitat, e promòir era economia sociau.

Damb un pressupòst de 3.300.000 èuros, era iniciatiua deth Departament consistís ena creacion de 15 Atenèus Cooperatius, distribuïdi per diuèrses demarcacions, que daràn servici, atencion e cobertura a persones, empreses, cooperatives e societats laboraus entà enfortir era economia sociau e cooperativa en marc deth programa Aracoop.

Aguesta iniciatiua deth Departament da responsa ara Resolucion 17/XI deth Parlament de Catalonha sus era situacion d’emergéncia sociau, era reactivacion economica, era gestion publica e eth besonh d’ua responsa institucionau que sollicite eth Govèrn a aplicar, per miei deth programa Aracoop, mesures dedicades a promòir era creacion de naues cooperatives e societats laboraus, mès que mès per part des joeni e persones en caumatge sustot mès granes de cinquanta ans.

Pendent era sua intervencion, Santacana a soslinhat qu’aguesta iniciatiua “se centre en favorir era creacion d’empresa d’conomia sociau e cooperativa, ath delà d’enfortir era viabilitat e sostenibilitat des projèctes e experiéncies existentes entà melhorar era aucupacion e eth desvolopament deth territòri”.

Atau madeish, eth Hilat trabalharà entà transformar associacions e empreses en cooperatives e societats laboraus, e promoirà era formula cooperativa e des SAL entara contunhitat d’empreses e entitats propères ath barrament.

Entitats beneficiàries e lòc territoriau des 15 Atenèus Cooperatius

Es entitats qu’òpten ara subvencion deth Departament entà crear es 15 atenèus pòden èster entitats locaus, empreses cooperatives o societats laboraus, associacions e fondacions qu’agen experiéncia en airau deth projècte e demòstren era sua capacitat entà amiar-lo a tèrme, e agropacions sense personalitat juridica.

Aguestes entitats sollicitants, constituïdes legauments e damb establiment operatiu en Catalonha, auràn de presentar eth projècte d’Atenèu cooperatiu en ua des demarcacions territoriaus: Region Naut Pirenèu e Aran; Barcelona ciutat; Region Barcelona; Region Camp de Tarragona; Region Girona; Region Catalonha Centrau; Region Lleida/Ponent; e Region Tèrres der Ebre.

Es Atenèus Cooperatius daràn prioritat as persones joenes, es que siguen en situacion de caumatge, sustot es majors de 50 ans, demandants d’aucupacion inscrita enes burèus deth Servici Public d’Aucupacion de Catalonha que volguen crear ua empresa cooperativa o societat laborau.

Ath delà, es Atenèus prestaràn supòrt ad aqueres empreses o entitats qu’agen capacitat per incentivar era creacion d’empreses cooperatives e societats laboraus, coma entitats publiques, assessories, gestories, escòles de negòci, entitats formatives, empreses en transformacion, associacions e fondacions.

Cooperatives e aucupacion en Catalonha

Ena actualitat, i a 3.946 cooperatives en Catalonha. Enquiath mes d’agost d’enguan se n’an constituït 115, era madeisha quantitat qu’en tot er an 2015. Enes cooperatives de Catalonha i trabalhen 45.666 persones, segons es donades deth dusau trimèstre d’enguan, era chifra mès nauta des deth 2007.

Vielha, 3 de noveme de 2016

Conselh Generau d’Aran: Núria Sanjuan