Es dies 24 e 25 d’octobre se celebrarà en Aran eth prumèr Congrès de ciberseguretat damb er objectiu d’aufrir solucions efectives as rèptes que plantege era ciberseguretat actuaument
Eth Conselh Generau d’Aran, a trauès de HèPic, eth Centre d’Innovacion Territoriau dera Val d’Aran, organize damb eth supòrt dera Agència de Ciberseguretat de Catalunya eth prumèr Congrès ARMARI 6 de Ciberseguretat.
Aguesta prumèra edicion convòque a expèrts en matèria tant des administracions publiques coma de granes enterpreses privades e PYMES, entà compartir coneishements, impulsar eth debat e intercambiar experiéncies des de diuèrses perspectives ençà.
En format de ponéncies e taula redona, s’exposaràn diferenti enfòcs sus com protegir es organizacions des ciberdelinqüents, abordant tematiques coma: era intelligéncia artificau, es Centres d’Operacions de Seguretat (SOC) e er Esquèma Nacionau de Seguretat (ENS). Tanben, se presentaràn es tendéncies actuaus en ciberseguretat e s’abordarà era repercussion dera sostraccion de dades deth punt d’enguarda legau. Fin finau, analisaram com reaccionar dauant d’un atac e s’expausarà un cas practic en detalh.
Eth vicesindic dusau e conselhèr d’innovacion deth Conselh Generau d’Aran, Oriol Sala, a remercat que: “En Departament d’Innovacion auem un gran interès ena formacion e difusion de coneishement sus ciberseguretat, pr’amor que supause un important rèpte en çò que tanh ara proteccion de dades”.
Un còp acabades es ponéncies, s’amiaràn a tèrme activitats pendent era dimenjada qu’includissen era presentacion d’un projècte innovador damb tecnologia de realitat aumentada e visites tà diuèrsi parçans emblematics dera Val d’Aran.
En paraules dera sindica d’Aran, Maria Vergés: “Qu’era Val d’Aran acuelhe congrèssi e jornades coma aguestes ei ua mòstra dera volontat e capacitat deth territòri d’èster referent en airaus de tanta importància aué en dia coma eth dera ciberseguretat”, e higie que: “Er objectiu d’aguest congrès ei hèr a conéisher bones practiques e solucions as territòris de montanha per un problèma qu’afècte tant as institucions coma as enterpreses e ara ciutadania”.