• Eth secretari d’Estat de Ruralitat de França e eth secretari generau entath Rèpte Demografic espanhòu presidiren ager aguesta jornada impulsada peth Ministèri entara Transicion Ecologica e eth Rèpte Demografic, ena que participèc tanben era sindica d’Aran, en tot plantejar es diuèrsi rèptes a abordar ena relacion transtermièra entre era Val d’Aran e França coma era redubertura deth Portilhon o era cooperacion economica e en matèria de sanitat

Pendent eth dia d’ager, era Val d’Aran acuelhec ua jornada sus desvolopament rurau e cooperacion transfronterèra en marc dera estrategia Espanha-França que desvolòpe eth Ministèri entara Transicion Ecologica e eth Rèpte Demografic.

Eth secretari generau entath Rèpte Demografic, er aranés Francés Boya, amièc a tèrme ua jornada de trabalh intensiva  damb eth secretari d’Estat de Ruralitat de França, Joël Giraud, que comencèc ena region des Hautes-Pyrénées e culminèc en Aran, damb ua amassada ena que preneren part tanben era sindica d’Aran, Maria Vergés, es conselhèrs e conselhères d’Aran, alcaldes deth territòri, e representants locaus deth Pallars Sobirà, Alta Ribagorça, Òsca, Haute-Bigorre, Aulon e Aspin-Aure.

“Deth govèrn deth Conselh Generau ençà èm plan satisfets de qu’era Val d’Aran age recebut, per prumèr còp ena istòria, era visita d’un secretari d’Estat francés, damb qui auem podut tractar ahèrs urgents entath nòste territòri coma eth besonh que se torne a daurir eth pas deth Portilhon, qu’amasse dus territòris vesins e damb ua relacion de cooperacion istorica, e auem abordat tanben d’auti ahèrs primordiaus entà Aran coma era collaboracion transfronterèra en matèria de sanitat, ensenhament e economia”, afirmaue era sindica d’Aran, en tot híger que: “cau destacar qu’aguest contacte damb eth secretari d’Estat de Ruralitat francés a estat possible gràcies ara preséncia d’un representant aranés en Ministèri entara Transicion Ecologica e eth Rèpte Demografic, qu’ei coneishedor des besonhs e es rèptes de futur qu’an es territòris transfronterèrs coma eth nòste”.

En aguest sens, Vergés manifestaue tanben que: “volem qu’eth Conselh Generau sigue ua institucion activa enes relacions damb er Estat francés entà poder cercar conjuntament solucions as besonhs e rèptes de futur compartidi, dera madeisha manèra que ja ac hèm damb d’auti territòris vesins coma es comarques deth Naut Pirenèu, damb qui mantenguem ua estreta relacion de collaboracion”.