Vielha, 24 d’octobre de 2017.- Es impulsors de “Era Mongetada”, Marcel Elias e Carlos Sanllehy, acompanhadi dera conselhèra de Torisme e Desvolopament Economic d’Aran, Anna Díaz, an presentat aué ena sedença deth Conselh Generau d’Aran era naua edicion d'”Era Mongetada” 2017, ua hèsta gastronomica-culturau qu’enguan arribe ara 6au edicion.
A compdar dera recuperacion dera varietat vegetau pròpria dera Val d’Aran, era “mongeta de Bossòst” ja arreconeishuda coma ua varietat peth Ministèri en an 2014, es impulsors damb era collaboracion des Ajuntaments deth Naut Aran e Bossòst, e era ajuda de diuèrses mèrques, establiments e professionaus deth sector dera restauracion, dèc lòc a un projècte de revalorizacion dera agricultura, era gastronomia e er auviatge culturau dera Val d’Aran.
Bossòst, Garòs e Arties acuelhen “Era Mongetada” 2017
Pendent era presentacion d’aguesta edicion, Carlos Sanllehy, a soslinhat qu’enguan era activitat se concentre pendent es dies 28 e 29 d’octobre. Eth dissabte en Bossòst, a on serà eth centre dera activitat gastronomica damb eth ja tradicionau “Dinar de pagès”, atau coma vessant festiua de “Era Mongetada”, damb activitats entàs mès petiti e damb era novetat deth 1èr campionat de “Butifarra”, e a compdar des 19 ores era net occitana damb un menu de 5 pinchos e es actuacions musicaus deth grop Gojates e de Lou Seriol.
Eth dimenge 29 eth protagonisme serà entad “Esdejoar Gastronomic”, un Espectacle-Cooking elaborat pes codinèrs convidadi en aguesta edicion, James Goodyear, chef deth restaurant “Welbourne” de Bristol (Anglatèrra) e Eva Hausmann, chef, consultora e estilista gastronomica (Barcelona); damb era collaboracion des codinèrs des restaurants dera Val d’Aran, qu’un an mès collabòren en “Era Mongetada”.
Era hèsta deth dimenge finalizarà damb un concèrt de musica occitana a cargue de Boilleurs de son.
Sanllehy, soslinhèc qu’era arrason d’èster d'”Era Mongetada” ei qu’era agricultura e era gastronomia dera Val d’Aran poguen anar junhudes. Tanben, anoncièc qu’encara calerà demorar dus ans entara comercializacion dera mongeta de Bossòst, pr’amor que se requerís ua produccion minima entà assegurar er èxit comerciau.
