• Eth Conselh Generau d’Aran, a trauès deth Musèu dera Val d’Aran, a organizat dues activitats ath torn dera estrea deth metratge Canigó: ua charrada en Musèu eth dia 4 d’abriu e era estrea e collòqui sus eth film eth dia 5.

• Eth film, produsit per Film Explora e dirigit per Albert Naudín, narre era aventura de Jacint Verdaguer en Pirenèu en 1883 e a compdat damb eth patrocini deth govèrn d’Aran e era collaboracion des còlhes dançaires d’Aran, coordinades a trauès deth Musèu dera Val d’Aran.

Era Val d’Aran acuelherà era pròplèu setmana, es dies 4 e 5 d’abriu, era estrea e presentacion deth film Canigó, damb diuèrses activitats culturaus e divulgatives sus Jacint Verdaguer.

Eth dijaus dia 4 d’abriu, tàs 19 ores, eth Musèu dera Val d’Aran acuelherà era charrada de Bernat Gasull, guionista deth film, biològ e estudiós de Jacint Verdaguer. Era charrada pòrte com a títol “La visita de Jacint Verdaguer a la Val d’Aran a l’estiu de 1883” e meterà en valor era vessant mès excursionista deth poèta, atau coma es lòcs que l’inspirèren entà escríuer era sua grana òbra, eth poèma epic Canigó (Restanca, Lac de Mar, Valarties, Arties, Gessa, Montgarri, Maubèrme, era Gireta, MontValièr e Coserans).

Eth diuendres dia 5 d’abriu, tàs 19 ores, aurà lòc era estrea deth film Canigó ena Sala Era Audiovisuau de Vielha. Aguest eveniment represente era prumèra estrea en Pirenèu e acabarà en collòqui damb era preséncia deth guionista, Bernat Gasull, e eth director, Albert Naudín. Pendent tota era dimenjada, era pellicula se poderà veir ena sala Era Audiovisuau, coma part dera sua programacion.

Era charrada deth dijaus 4 ei gratuïta, mès era capacitat deth musèu ei limitada. D’un aute costat, entà assistir ara estrea deth film, cau contactar damb eth Musèu dera Val d’Aran entà poder reservar e remassar es invitacions. Pendent es dies 6 e 7 eth film se poderà veir en cartelèra, per aquerò eth prètz se regís cossent damb es tarifes abituaus dera Audiovisuau.

En 1883, Mossen Cinto Verdaguer decidís cercar era inspiracion en Pirenèu, entà crear eth Cant Quatau deth poèma Canigó, un viatge imaginari per montanhes en ua calessa voladora. Eth viatge s’organizèc entà poder arribar eth dia 15 d’agost en Montgarri, en tot coincidir damb eth romiatge.

Era scèna que recree eth romiatge e era caritat compdèc damb era participacion des quate còlhes dançaires d’Aran, coordinades a trauès deth Musèu. Eth repartiment deth film ei format per actors com Lluís Soler, Santi Pocino, Sílvia Bel e Xavier Boada. Eth guidon, per part de Bernat Gasull, s’elaborèc a compdar d’un gran trabalh de documentacion e recèrca inedita enquiath moment, en tot reconstruir e recuperar es passi deth poèta per tot eth Pirenèu.