Era Val d’Aran acuelherà ua pròva dera Copa deth Mon d’Esquí de Montanha es dies 8 e 9 d’abriu de 2017

Eth Conselh Generau d’Aran apòrte 30.000 € ara organizacion dera carrèra qu’amiarà eth nòm de Val d’Aran 2017 ISMF World Cup

Vielha, 21 de junh de 2016.- Era Val d’Aran acuelherà ua pròva dera Copa deth Mon d’Esquí de Montanha es dies 8 e 9 d’abriu de 2017. Eth nòm oficiau dera carrèra serà Val d’Aran 2017 ISMF World Cup, e era sedença dera organizacion serà es poblacions de Vielha e Naut Aran.

Aguesta carrèra serà ua des cinc puntuables entara Copa Mondiau dera International SkiMountainering Federation. Eth dissabte 8 d’abriu se disputarà era pròva individuau, e eth dimenge 9 d’abriu, era carrèra verticau, laguens dera pròva Era Pujada. Parallèlaments se celebraràn es pròves open e Copa Catalana d’Esquí de Montanha dera FEEC.

Era competicion organizada peth Centre Excursionista de Catalunya (CEC) e eth CE d’Aran, se disputarà en entorn dera estacion d’esquí de Baqueira Beret, e aurà eth supòrt dera Federacó d’Entitats Excursionistes de Catalunya (FEEC) e era FEDME.

Es melhors esquiaires de montanha deth mon, damb eth vigent guanhador dera copa, eth catalan Kilian Jornet, se trobaràn ena Val d’Aran, ath que s’ahigeràn nòms coma es des italians Michele Boscacci, Roberto Antonioli, er alemand Anton Pälzer, eth francés William Bon Mardion, o es catalans Oriol Cardona e Marc Pinsach, que seràn quauqui uns des atractius a auer en compde en categoria masculina.

Ena categoria femenina ath delà des catalanes Claudia Galícia, Marta Garcia, Laura Orgué e Mireia Miró, destaque er actuau numèro 1 deth mon, era francesa Laetitia Roux, era tanben francesa Axelle Mollaret e era italiana Katia Tomatis.

Eth vicesindic d’Aran e conselhèr d’Espòrts, Luís Carlos Medina, soslinhèc que “eth includiment dera Val d’Aran en calendari dera ISMF World Cup 2017, supause un pas mès ena consolidacion dera Val d’Aran coma destinacion esportiua de pròves de naut nivèu internacionau, ath delà dera consolidacion coma sedença de referéncia entà pròves d’esquí de montanha”. Medina a volut “destacar un còp mès era predisposicion de Baqueira Beret ara ora de dar supòrt as iniciatiues esportiues deth Govèrn d’Aran”.

Eth ISMF s’amassèc era darrèra dimenjada en Portugau, a on s’a celebrat era assemblada annau. Ena assemblada s’a decidit eth calendari dera pròplèu sason, a on s’includís era pròva aranesa.

Foto: FEEC