• Eth distintiu ac liurarà era Secretaria d’Estat de Torisme eth dijaus 21 de gèr en marc de FITUR e se presentaràn es linhes generaus des informes de Destinacions Toristiques Intelligentas (DTIs).

• A compdar deth mes de junh de 2015 era Societat Estatau entara Gestion dera Innovacion e es Tecnologies Toristiques (SEGITTUR), depenenta deth Ministèri d’Indústria, Energia e Torisme, e adscrita ara Secretaria d’Estat de Torisme, a analisat, diagnosticat e identificat es linhes d’accion dera Val d’Aran coma destinacion toristica enes airaus de sostenibilitat, innovacion, naues tecnologies e accessibilitat.

Era reconeishença de Destinacion Toristica Intelligenta avale era incorporacion ath modèl toristic dera Val d’Aran eth trabalh ena innovacion, tecnologia, sostenibilitat e accessibilitat, quate factors competitius que garantissen eth present e eth futur deth torisme ena Val d’Aran.
SEGITTUR inicièc eth trabalh DTI ena Val d’Aran en mes de junh, e a consistit en analisar e diagnosticar es linhes d’accion realizades en Aran coma destinacion enes quate variables que definissen a ua Destinacion Toristica Intelligenta, era fasa finau a consistit ena elaboracion d’un informe de recomanacions que s’intègren coma programes especifics en nau Plan de Torisme Val d’Aran 2016-2020 qu’actuauments s’elabòre e que se presentarà ath sector toristic dera Val d’Aran en mes de hereuèr.

Er anterior plan de torisme 2012-2015 dera Val d’Aran culmine damb er aqueriment d’aguesta reconeishença que s’enmarque en programa de competitivitat deth plan e a trauès deth quau s’an desvolopat diferentes linhes de trabalh qu’an artenhut qu’Aran arrecebe diferentes certificacions e reconeishences, entre es quaus subergessen eth de destinacion sostenible Biosphere autrejat peth Global Sustainable Tourism Council dera Fundación Naciones Unidas, finalista enes Destination Leadership autrejadi pera National Geographic Society e era ITB de Berlin, e aguest darrèr peth sòn trabalh coma Destinacion Toristica Intelligenta (projècte impulsat peth Ministèri d’Indústria, Energia e Torisme, a trauès deth Plan Nacionau e Integrau de Torisme 2012-2015).

Era Val d’Aran a estat un des projèctes pilòt desvolopat per SEGITTUR e qu’a consistit en analisar e recomanar accions enes quate èishi que conformen un DTI: innovacion, tecnologia, sostenibilitat e accessibilitat. Er informe arrecuelh tota era informacion de besonh sus es hònts de finançament que faciliten eth desvolopament des accions e qu’aufrissen tant eth Ministèri d’Indústria, Energia e Torisme, a trauès deth Plan Nacionau de Ciutats Intelligents, Emprendetur e eth FOMIT, coma era Union Europèa, mejançant es hons FEDER.

Des deth Govèrn d’Aran s’an realizat sessions informatives a empresaris e institucions araneses entà explicar eth significat des Destinacions Toristiques Intelligentes. En paraules dera conselhèra de Torisme e Desvolopament Economic d’Aran, Anna Díaz “ua Smart Destination ei ua destinacion innovadora, que trabalhe en assolidar era sua infrastructura tecnologica e que garantís eth desvolopament sostenible deth territòri. Facilite era interaccion e integracion deth visitant damb er entorn e incremente era qualitat dera sua experiéncia”. Díaz a hijut “era Val d’Aran, ei ua destinacion toristica competitiva qu’aufrís servicis de qualitat a quinsevolh perfil de viatgèr”.

“Damb era implantacion deth Sistèma de Torisme Responsable e er aqueriment deth certificat Biosphere, era Val d’Aran auance cap a un nau modèl de desvolopament toristic basat enes principis dera sostenibilitat, era diuersitat culturau e era responsabilitat sociau, era quau causa contribuís ath hèt qu’era Val d’Aran sigue ua destinacion toristica basada en respècte dera sua cultura, eth miei ambient e era responsabilitat” a soslinhat era conselhèra de Torisme e Desvolopament Economic d’Aran, Anna Díaz.

Era reconeishença la liurarà era secretària d’Estat de Torisme, Isabel María Borrego, e ac recuelherà era conselhèra de Torisme e Desvolopament Economic d’Aran, Anna Díaz, er acte serà eth dijaus 21 de gèr, de 15:00 a 15:30 ores, en Auditòri der airau “Fitur Know-how & Export”, plaçat en Pabalhon 10-B21 d’IFEMA.

Vielha, 15 de gèr de 2016

Conselh Generau d’Aran: Núria Sanjuan