Era Conselhèra de Torisme deth Conselh Generau d’Aran, Anna Díaz, a estat present ena Secretaria d’Estat de Torisme en acte dera signatura deth convèni de collaboracion entà validar eth sagèth de Torisme Familhar coma Club de Producte especializat en eth segment familhar.

Eth Conselh Generau d’Aran e eth sector toristic dera val an trabalhat entà abilitar era aufèrta as besonhs des familhes, en tot aufrir prepauses adequades entà toti es sòns membres.

Era Conselhèra de Torisme deth Conselh Generau d’Aran, Anna Díaz, a assistit ar acte dera signatura deth convèni de collaboracion en qué era Secretaria d’Estat de Torisme, era Secretaria d’Estat de Servicis Sociaus e Igualtat e era Federacion Espanhòla de Familhes Nombroses (FEFN) participauen entà validar eth sagèth de Torisme Familhar coma Club de Producte Toristic especializat en segment familhar.

Prealable ara signatura deth convèni, s’an hèt dues exposicions, sus era vision e linha estrategica deth Sagèth de Torisme Familhar e sus es linhes d’auanç e innovacion deth Sagèth Torisme Familhar. Es secretàries d’Estat presents en acte e era presidenta dera FEFN an signat eth convèni abans qu’era Federacion hesse autrejament deth certificat d’arregraïment era reconeishença ar esfòrç que des deth Conselh Generau d’Aran s’a hèt entà promòir aguest segment toristic.

Era conselhèra Díaz a declarat en Madrid: “eth segment deth torisme familhar ei important entara Val d’Aran, ei per açò, que s’a trabalhat entà aufrir-les responsa as sòns besonhs, en çò que tanh ath lotjament, coma ena restauracion o era aufèrta complementària, eth sagèth mos permet realizar accions de comercializacion e promocion dera aufèrta dera val dirigida as familhes”.

Era Val d’Aran a fòrça causes a díder en encastre deth torisme familhar, era sua aufèrta, tant en iuèrn coma en ostiu, amasse atractius mès que sufisents entà motivar as familhes a visitar era val. Era grana varietat d’aufèrtes en activitats, Aran Park en Bossòst, era possibilitat d’iniciar-se o practicar espòrts d’iuèrn o d’aventura e eth comèrç, era gastronomia o era madeisha istòria d’Aran configuren ua destinacion atractiua entà totes es edats.