Anna Díaz, conselhèra de Torisme e Desvolopament Economic deth Conselh Generau d’Aran, arrecebec de mans dera secretària generau de Torisme Isabel María Borrego, era distincion qu’acredite era Val d’Aran coma Destinacion Toristica Intelligenta (DTI) ena edicion d’aguest 2016 dera Hèira Internacionau deth Torisme- FITUR, concedida pera Societat Estatau entara Gestion dera Innovacion e es Tecnologies Toristiques (SEGITTUR).

SEGITTUR inicièc eth trabalh DTI ena Val d’Aran en mes de junh. Un trabalh que consistic en analisar e diagnosticar es linhes d’accion realizades en Aran coma destinacion toristica enes quate variables que definissen a ua Destinacion Toristica Intelligenta, innovacion, tecnologia, sostenibilitat e accessibilitat. Era fasa finau a consistit ena elaboracion d’un informe de recomanacions que s’integraràn coma programes especifics en nau Plan de Torisme Val d’Aran 2016-2020 qu’actuauments s’elabòre e que serà presentat ath sector toristic dera Val d’Aran pendent eth pròplèu mes de hereuèr.
Aguesta reconeishença ara Val d’Aran, se some a uns d’auti que destaquen entre eth, er eth de destinacion sostenible Biosphere autrejat peth Global Sustainable Tourism Council dera Fundación Naciones Unidas, finalista en es Destination Leadership autrejadi pera National Geographic Society e era ITB de Berlin.

Era conselhèra Anna Díaz, arregraïc en nòm deth Conselh Generau d’Aran e deth conjunt des aranesi aguesta reconeishença en tot ahíger que, “Damb era implantacion deth Sistèma de Torisme Responsable e era obtencion deth certificat Biosphere, era Val d’Aran auance entà un nau modèl de desvolopament toristic basat enes principis dera sostenibilitat, era diuersitat culturau e era responsabilitat sociau, çò que contribuís a qu’era Val d’Aran sigue ua destinacion toristica basada en respècte pera sua cultura, eth miei ambient e era responsabilitat “.