• Per un costat, eth Conselh Generau d’Aran a artenhut un ajut de 1’2M€ dera Fundación Biodiversidad, deth Ministèri entara Transicion Ecologica e Rèpte Demografic, entath projècte de gestion forestau qu’era maxima institucion amie a tèrme amassa damb bona part des ajuntaments aranesi e qu’a coma objectiu arténher un profitament sostenible des nòsti recorsi naturaus a trauès dera obtencion dera biomassa, en tot perméter tanben afrontar es huecs de sisaua generacion

• Atau madeish, s’a artenhut un dusau ajut dera Fundación Biodiversidad (Miteco) de 1,9 milions d’euròs entà implementar un ramat comunitari en municipi de Vilamòs tà recuperar eth paisatge tradicionau e netejar es entorns deth pòble que permete esvitar era propagacion de possibles huecs forestaus

Ager diuendres se publiquèren es ressolucions definitives des ajuts qu’era Fundación Biodiversidad, depenenta deth Ministèri tara Transicion Ecologica e Rèpte Demografic, ena que se confirmauen es dus ajuts qu’era Val d’Aran  a artenhut entà impulsar era bioeconomia en nòste territòri.

Eth prumèr ajut, d’1’2M€, ei destinat a desplegar eth projècte de gestion forestau qu’eth govèrn d’Aran impulse damb bona part des ajuntaments aranesi, e tath qu’es passadi dies se constituie era Comission Forestau. En aguesta estratègia eth govèrn d’Aran trabalhe damb eth Centre de Sciéncia e Tecnologia Forestau de Catalunya e a presentat er ajut damb eth supòrt era associacion de municipis de montanha d’España, esMontañas, er ajuntament de Bonansa e era associacion ELFOCAT.

Er objectiu d’aguesta estrategia ei eth de recuperar era gestion des recorsi forestaus de manèra conjunta entre eth Conselh Generau e es ajuntaments entà auançar ena disminucion dera peada de carbòni, era autosufisença energetica basada ena biomassa e es hilats de calor enes nòsti pòbles que permeten ua reduccion dera despena en energia autant des administracions coma dera ciutadania.

D’un aute costat, era Fundación Biodiversidad a autrejat 1’9M€ tath projècte pilòt entà installar un ramat municipau d’ath torn de 250 oelhes e crabes en Vilamòs, que atau e coma manifestaue eth conselhèr de Gestion Ambientau e Transicion Energetica e alcalde de Vilamòs, Oriol Sala “preten recuperar eth paisatge tradicionau, netejar finques qu’an estat aucupades pera vegetacion e atau crear un talhahuec qu’ajude a esvitar era propagacion de huecs” e higie que “aguesti dus projèctes son ua mòstra dera apòsta deth govèrn d’Aran entà recuperar era gestion forestau des nòstes montanhes e poder arténher uns bòsqui mès resilients ath cambi climatic e as incendis forestaus”

Era sindica d’Aran, Maria Vergés, afirmaue tanben que: “obtier aguesta quantitat de recorsi tant importanta resulte de fòrça ajuda entà possar aguesti projèctes que consideram estrategics entath país e que mos an d’ajudar a diversificar era economia e a adaptar-mos as rèptes que mos plantege eth cambi climatic”.

BoscAran compde damb eth supòrt dera Fundación Biodiversidad deth Ministerio para la Transición Ecológica y el Reto Demográfico (MITECO) en marc deth Plan de Recuperacion, Transformacion e Resiliéncia (PRTR), finançat pera Union Europèa – NextGenerationEU.