Vielha, 29 de març de 2016.- Era conselhèra de Torisme deth Conselh Generau d’Aran, Anna Díaz, hec aué era valoracion toristica dera Setmana Santa ena Val d’Aran, en tot soslinhar qu’era aucupacion otelèra a artenhut eth 95%, sustot enes establiments mès pròplèus ara estacion d’esquí de Baqueira Beret que, ath madeish còp a trauès d’un comunicat manifestèc auer venut ath torn de 100.000 forfaits pendent aguesta Setmana Santa.

Era conselhèra a destacat eth hèt qu’era Setmana Santa sigue a fins de març a hèt que fòrça visitants agen preferit eth Pirenèu en lòc d’autes destinacions. Çò qu’acompanhat deth bon temps qu’auem gaudit pendent aguesti dies, a hèt possible as toristes poder realizar d’autes activitats ath delà der esquí, coma es desparières rotes de montanha e accedir as pistes d’Artiga de Lin e era Bassa d’Oles, ath delà des activitats restacades damb es espòrts d’aventura.

Era conselhèra a destacat era bona aucupacion de tota era aufèrta otelèra dera Val d’Aran, includit eth torisme rurau e es campings.

En çò que tanh ath conjunt dera sason d’iuèrn, Anna Díaz, soslinhèc qu’aguesta comencèc ben damb nheuades en mes de noveme que permeteren començar era sason a plen rendiment, en tot passar per un bon Nadau e un fòrça bon mes de hereuèr damb visitants procedenti de França, gràcies ath bon trabalh amiat a tèrme des deth nau burèu de torisme de Toulouse daurit amassa damb Baqueira Beret, e un notable increment de toristes anglesi. Tot açò damb ua fin de sason esplendida en Setmana Santa. Era conselhèra Anna Díaz, remerquèc qu’eth principau client dera Val d’Aran contunhe en tot èster Catalonha, Madrid e eth Pais Basc.

Eth Tour de França en ostiu

Pendent era sua intervencion deuant es mejans, Anna Díaz a explicat qu’ara es esfòrci dera equipa de Torisme Val d’Aran, se centraràn ena promocion dera etapa deth Tour de França qu’era Val d’Aran acuelherà eth pròplèu 10 de Junhsèga. Per açò a avalorat positivaments que fòrça des toristes que mos an visitat en Setmana Santa, didec, “agen ja escuelhut coma activitats es restacades damb era biciclèta, ja sigue a trauès de BTT, “enduro” o cicloturisme, activitat aguesta darrèra que volem potenciar ara ena Val d’Aran”.