• Pendent eth pònt que viem de passar, era aufèrta otelèra dera Val d’Aran a estat d’un 92% de places dubèrtes, des quaus, s’an aucupat un 80%. Tanben, ena Oficina de Torisme de Vielha, aguesti dies s’a informat a 1.086 persones.

Eth Departament de Torisme deth Conselh Generau d’Aran a remassat es donades d’aguest inici dera sason toristica d’iuèrn entà poder hèr es prumères avaloracions de cara ara rèsta dera tempsada. Enguan, aguest pònt de deseme s’an aufertat un 92% des places otelères existentes ena Val d’Aran, enes que s’an lotjat un 80% de visitaires.

Ara grana afluéncia de toristes arribadi aguesti dies, s’an somat es intenses nheuades qu’an deishat ua mieja de 185 cm de nhèu enes còtes mès nautes d’Aran. Pr’amor d’aguestes condicions meteorologiques, i an auut modificacions de darrèra ora enes reserves otelères d’Aran. Taben, a influenciat ena aucupacion, era recomanacion de gessuda en auança des toristes lotjadi en nòrd d’Espanha, realizada pera DGT eth dia 6 de deseme pera tarde.

En aguest sens, segontes a afirmat eth conselhèr d’Economia, Torisme e Promocion Economica, Juan Antonio Serrano: “A estat un pònt molt bon toristicament pr’amor de 3 factors clau. En prumèr lòc, es nheuades prèvies an garantit as esquiaires ues excellentes condicions tara practica d’aguest espòrt. En segon lòc, aguest pònt qu’ei pròpri deth calendari de hèstes nacionaus, es familhes que tradicionaument viatjauen as principaus ciutats europèes, enguan pr’amor dera situacion dera pandemia, an escuelhut un destin en Espanha en tot destacar Aran entre es principaus endrets. E fin finau, er hèt qu’er an passat fòrça apassionadi dera nhèu non podessen apropar-se a gaudir des espòrts de nhèu, a hèt qu’enguan auessen fòrça desirs de vier entara Val d’Aran”.

Tant ei atau, qu’aguesti dies de pònt, eth sector otelèr a artenhut un 31,21% mès de visitaires respècte ath 2018, que siguec d’un 48,79%, en tot qu’eth percentatge d’aucupacion deth 2019 siguec d’un 85,25%. Es donades de 2020 non s’an auut en compde en aguest balanç comparatiu pr’amor dera situacion de restriccions dera situacion sanitària provocada pera COVID-19.

Es positives donades toristiques d’enguan, son frut der esfòrç des importantes campanhes de promocion enes diuèrsi canaus de comunicacion que s’an anat realizant peth Departament de Torisme deth Conselh Generau d’Aran e des mesures prenudes pes otelèrs entà complir es normatives sanitaries vigentes.

Ath delà, era atencion personalizada qu’aufrís era Oficina de Torisme de Vielha a hèt qu’enguan 461 persones mès qu’en 2019, s’i apròpen tà obtier informacion sus era agenda culturau e d’activitats deth nòste territòri.