• Pendent aguestes dates de tanta afloéncia, es servicis publics gestionadi peth Conselh Generau an foncionat corrèctament

Era Val d’Aran a barrat damb èxit un pònt de deseme damb mès de 40.000 persones. Pendent aguestes dates de tanta afluéncia, es servicis publics aranesi an foncionat de forma corrècta e non s’an produsit incidents destacadi.

Er esfòrç realizat des deth govèrn deth Conselh Generau d’Aran a permetut qu’eth servici de remassada de lordères foncionèsse, a despièch dera complexitat que represente era grana quantitat de volum que se genère pendent aguestes dates.

Per çò que hè ar impacte que produsís era preséncia de tantes persones en Aran pendent tant pògui dies ena vialitat des carretères, eth govèrn aranés a demanat ath Departament de Territori e Sostenibilitat dera Generalitat era implantacion d’accions entara potenciacion deth transpòrt public e era milhora dera floïdesa deth transit ena  C-28.

En aguest sens cau rebrembar qu’eth govèrn d’Aran a demanat ath  Ministèri de Foment , ara Direccion Generau de Transit (DGT) e ath Servici Catalan de Transit (SCT) era limitacion deth pas de camions de Benabarre enquiara termièra francesa es dimenjades de deseme a març, coma ua mesura entà garantir era seguretat ena N-230 pendent era tempsada d’iuèrn

Segontes afirme eth sindic d’Aran, Francés Boya, aguest “a estat un pònt fòrça profitós e un bon inici de tempsada, qu’ère de besonh entara recuperacion economica e tàs empreses araneses dedicades ath torisme” e hig que “s’a realizat un gran esfòrç entà qu’era remassada de lordères pendent aguestes dates sigue çò de mès eficaça possible”.