• Entre es dies 26 de deseme e 9 de gèr, era ocupacion otelèra mieja a estat de lèu un 80% segontes es donades deth Departament de Torisme deth Conselh Generau d’Aran, ua chifra superior as des ans 2020 e 2019

Era Val d’Aran a barrat enguan es hèstes de Nadau damb ues donades d’aucupacion fòrça positives: pendent es dies 26 de deseme e 9 de gèr, s’artenhec arribar lèu a un 80% segontes es donades de Foment Torisme Val d’Aran.

“Aguest periòde de vacances a auut ues donades fòrça bones, arribant a superar es donades prepandèmia, quauquarren qu’a repercutit positivament en comèrç, restauracion, ostalaria e apartaments toristics” afirmaue eth vicesindic e conselhèr d’Economia, Torisme e Promocion Economica, Juan Antonio Serrano, en tot híger que: “a despièch que i a auut fòrça anullacions pr’amor dera pandèmia, tanben s’an experimentat un elevat nombre de resèrves de darrèra ora”.

Pendent aguestes hèstes, era ocupacion a estat un 29,6% superior ara des Nadaus de 2020/2021 (48,4%) e un 17,2% superior ara de 2019/2020 (60,8%).

Eth tanben conselhèr d’Economia, Torisme e Promocion Economica, Josep Canut, a mostrat era sua satisfaccion per aguestes donades en tot manifestar que “demòstren qu’eth nivèu dera nòsta aufèrta toristica ei de nauta qualitat” e a volut arregraïr “eth trabalh amiat a tèrme per toti es estaments, publics e privadi, pendent aguestes dates de tant nauta afluéncia en nòste territòri”.

Es positives donades toristiques d’enguan, son frut der esfòrç des importantes campanhes de promocion enes diuèrsi canaus de comunicacion que s’an realizat deth Departament de Torisme deth Conselh Generau d’Aran ençà, atau coma der esfòrç e dedicacion des establiments ostelèrs, de restauracion e comèrç.