• Entre es dies 26 de deseme e 5 de gèr, era ocupacion otelèra mieja a estat d’un 92% segontes es donades de Foment Torisme Val d’Aran, peth dessús der an passat

• Era meteorologia a permetut tanben as visitants desvolopar activitats desparières ar esquí, qu’ei eth principau atractiu toristic pendent aguestes dates

Era Val d’Aran a barrat enguan es hèstes de Nadau damb ues donades fòrça positives entath territòri: pendent es dies 26 de deseme e 5 de gèr, era aucupacion otelèra mieja a estat d’un 92% segontes es donades de Foment Torisme Val d’Aran.

Eth bon temps e era nhèu presenta ena estacion d’esquí de Baqueira Beret an completat ua ofèrta toristica que, ath delà der espòrt blanc, a compdat tanben damb activitats de tot tipe organizades en tot eth territori.

“Es persones que mos an visitat an auut era possibilitat de gaudir de d’auti espòrts coma eth ciclisme o eth senderisme, visitar es diferents pòbles dera Val d’Aran, conéisher eth romanic e era oferta culturau deth territòri”, afirme eth conselhèr d’Economia, Torisme e Promocion Economica, Juan Antonio Serrano, que hig que: “aguestes hèstes de Nadau an estat tanben fòrça positives entath comèrç e era restauracion”.

Pendent aguesti dies era Val d’Aran a superat es donades d’ocupacion der an anterior, en tot barrar es hèstes de Nadaus damb un resultat força positiu entath sector toristic aranés.

Eth sindic d’Aran, Francés Boya, a mostrat era sua satisfaccion per aguestes donades en tot manifestar que “demòstren qu’eth nivèu dera ofèrta toristica aranesa ei d’ua nauta qualitat” e ath madeish temps a volut “arregraïr eth trabalh de toti es estaments, publics e privadi, qu’an hèt possible arténher aguesti resultats”.