• Pendent es dies 26 de deseme e 8 de gèr, era acucupacion otelèra mieja dera Val d’Aran a estat d’un 77%, fòrça similar ara der an anterior (78%), segontes es donades deth Departament de Torisme deth Conselh Generau d’Aran

Era Val d’Aran a barrat enguan es hèstes de Nadau damb ues donades d’aucupacion fòrça positives: pendent es dies 26 de deseme de 2022 e 8 de gèr de 2023, s’a artenhut arribar a un 77%, segontes es donades de Foment Torisme Val d’Aran.

“Deth govèrn deth Conselh Generau d’Aran ençà valoram fòrça positivament es donades artenhudes pendent aguest periòde de vacances, que s’a mantengut fòrça similar ath der an passat”, afirmaue eth conselhèr d’Economia, Torisme e Promocion Economica, Juan Antonio Serrano, en tot híger que: “era varietat, quantitat e qualitat de servicis qu’aufrís eth nòste territòri, en airaus coma eth comèrç, restauracion, osteleria, er espòrt o eth léser, mos an permetut mantier ues fòrça bones donades”.

Pendent aguestes hèstes era aucupacion a estat sonque un 1% inferior ara deth Nadau de 2021/2022 (78%), e superior ara deth Nadau de 2020/2021 (48,4%) e ara de 2019/2020 (60,8%).

Enguan, era prumèra setmana de gèr (deth 2 ath 8) a artenhut ues donades istoriques damb un 71,12% d’acucupacion (er an passat s’artenhèc un 67%). En çò que hè ara darrèra setmana de deseme es donades d’enguan son d’un 82,9% (en 2021 siguec d’un 89,25%).

Eth tanben conselhèr d’Economia, Torisme e Promocion Economica, Josep Canut, a mostrat era sua satisfaccion per aguestes donades en tot manifestar que “demòstren qu’eth nivèu dera nòsta aufèrta toristica ei de nauta qualitat” e a volut arregraïr “eth trabalh amiat a tèrme per toti es estaments, publics e privadi, pendent aguestes dates de tant nauta afluéncia en nòste territòri”.