Era jornada gastronomica consistirà ena degustacion dera òlha aranesa, que serà codinada pera Escòla d’Ostalaria de Les.

Tanben se poderàn degustar diuèrsi productes dera Val d’Aran que formen part dera denominacion Marca de Garantia.

Foment Torisme Val d’Aran organize ua naua edicion dera hèsta gastronomica que pòrte per títol “Era Òlhada”, que consistirà ena degustacion d’un des productes tipics dera Val d’Aran com ei era òlha aranesa.

Eth dimenge, 9 de març a compdar des 13h, ena zòna deth Plan de Beret, era Escòla d’Ostalaria de Les serà era encargada de codinar aguest plat, que poderà èster degustat per toti aqueri que crompen eth tiquet per valor de 3€ que se meteràn ara venta.

En madeish lòc, mentre se minge aguest plat, tanben se poderàn tastar diferenti productes dera Val d’Aran includidi laguens dera Marca de Garantia. Atau, era jornada gastronomica supausarà ua grana oportunitat entà poder minjar diferenti productes deth territòri.

“Des de Foment Torisme Val d’Aran èm satisfèts de poder organizar ua naua edicion d’“Era Òlhada”, que supause era melhor manèra de poder dar a conéisher era nòsta gastronomia a toti. En tot profitar qu’er eveniment se celèbre ena estacion de Baqueira Beret, fòrça gent de dehòra deth territòri aurà era escadença entà degustar era òlha aranesa e d’auti productes locaus”, comente era conselhèra de Torisme, Comèrç e Consum dAran, Anna Díaz.