Eth festivau acuelherà cinc concèrts pendent eth mes d’agost

Vilac, Salardú, Bossòst, Arties e Vielha son es localitats que formen part de “Romanic Musicau”

A compdar deth pròplèu 1 d’agost era Val d’Aran celèbre ua naua edicion deth festivau “Romanic Musicau”, damb era preséncia de diuèrsi grops musicaus qu’aufriràn concèrts en desparières glèises romaniques deth territòri.

Enguan serà era 16au edicion deth festivau, que compdarà damb un totau de cinc jornades. Eth 1 d’agost eth hestivau darà començament ena glèisa Sant Félix de Vilac damb era accion de Duo Gal•la. Eth hestivau contunharà eth dia 8 damb eth concèrt deth grop Urpa Berta ena glèisa Sant Andrèu de Salardú. Era 3ª jornada se celebrarà eth 15 d’agost ena glèisa d’Era Purificacion de Maria de Bossòst, damb eth concèrt de Quartet Egara Saxofon. Eth dia 22 d’agost aurà lòc era accion deth Trio Corda Chaplin ena glèisa Santa Maria d’Arties. E, entà finalizar, eth grop Up a Up Concert actuarà eth 29 d’agost ena glèisa Sant Miquèu de Vielha.

“Eth festivau, dempús de 16 ans de celebracion, ei assolidat coma ua activitat culturau clau ena Val d’Aran. Ei un aunor poder compdar damb un pannèu damb grani artistes pendent eth mes d’agost e combinar era cultura musicau e patrimoniau. Ua experiéncia qu’autant es aranesi coma es visitaires saberàn apreciar pera sua grana qualitat artística”, comente era conselhèra de Torisme, Comèrç e Torisme, Anna Diaz.

“Era Val d’Aran aufrís as assistents deth festivau, ua mòstra der auviatge romanic que s’a suenhat e en tot conservar ath long des sègles, e que se poderàn contemplar en sòn maximal esplendor pendent era celebracion de cada concèrt. Des deth territòri s’a procurat mantier aguest actiu damb era melhora qualitat, e era barreja damb es grops convidadi favoriràn que sigue un festivau damb un gran potenciau musicau e patrimoniau”, ahigís eth cap de Cultura e Patrimòni, Jèp de Montoya.