Eth 17 de junh de 1991 se celebrèren es prumères eleccions ath Conselh Generau d’Aran.

Era Val d’Aran a celebrat aué, 17 de junh, era sua Hèsta a on se conmemòre era restitucion deth Conselh Generau d’Aran e era recuperacion des sòns drets e privilègis. Er acte a començat damb era desfilada des pendons portadi pes representants de cada terçon enquiath Santuari de Nòsta Senhora de Mijaran, a on s’a celebrat ua Missa. En tot finalizar, a debanat er acte institucionau dera Hèsta d’Aran enes roïnes deth santuari, a on es Pompièrs d’Aran an issat eth drapèu aranés damb er Imne d’Aran (Montanhes Araneses).

Era Hèsta d’Aran a compdat damb era preséncia deth sindic d’Aran, Carlos Barrera, a mès de toti es conselhèrs deth Plen deth Conselh Generau d’Aran, des alcades e presidents pedanis dera Val d’Aran, deth Director generau dera Administracion Locau dera Generalitat de Catalonha, Jordi Souto, deth Delegat deth Govèrn dera Generalitat deth Naut Pirenèu e Aran, Albert Alins, deth vicepresident dera Deputacion de Lleida, Pau Perdices, e de representantes dera Commune de Saint Béat.

Ara seguida eth sindic d’Aran, Carlos Barrera, a agut ues paraules enes qu’a manifestat “eth Conselh Generau d’Aran trebalharà en desplegament dera Naua Lei d’Aran. Er objectiu deth Conselh ei contunhar estant, coma tostemp a estat, ath costat des Ajuntaments deth país, ath costat des pòbles dera Val d’Aran, ath costat des vesins dera Val d’Aran e continunharam garantint, coma en aguesta passada legislatura, dar responsa a toti es vesins. As Ajuntaments les aufrim, coma tostemp, era man e era estreta e sincèra collaboracion damb leiautat institucionau entre Ajuntaments e Conselh Generau d’Aran, pr’amor qu’aguesta ei era forma de generar un blòc que pogue dar responses a un veritable país coma ei Aran”.

Barrera, tanben a anonciat qu’ “es vesins dera Val d’Aran seràn cridats a ua consulta entà conéisher era sua opinion referent ara modificacion dera lei electorau aranesa. Cercaram es mecanismes de besonh entà emmarcar era consulta laguens dera legalitat”.

Eth sindic d’Aran, Carlos Barrera, defense qu’eth pòble aranés sigue consultat pr’amor que se tracte dera sua representativitat ena maximala institucion aranesa. Barrera a soslinhat qu’era consulta s’amiarà a tèrme pendent aguesta legislatura e a rebrembat qu’era Lei d’Aran dejà parle d’un nau modèu electoral.

Era Hèsta d’Aran a finalizat damb dances araneses e damb un refrigeri entà toti es assistents.

Talh de votz deth sindic d’Aran, Carlos Barrera: