Vielha, 22 de març de 2019.- Eth Musèu dera Val d’Aran a celebrat eth Dia Internacionau dera Poesia damb un multitudinari recitau damb eth títol “Memòries en tinta”, restacat damb era memòria. Ua tematica que pendent tot enguan 2019, servirà coma hiu conductor des diuèrses activitats e actes que se desvoloparàn enes Musèus dera Val d’Aran damb er objectiu de méter en valor era memòria en totes es sues variantes.

Era recepcion deth Musèu dera Val d’Aran en Vielha a estat eth scenari qu’a acuelhut a toti es volontaris e volontàries qu’an participat ena serada, que compdèc damb era participacion especiau der actor Lluís Soler qu’a recitat poèmes de Mn. Jacint Verdaguer.

Ena serada tanben s’an recitat poèmes de Mn. Condò e Sambeat, qu’enguan se ne commemòren es 100 ans dera sua mòrt, en tot passar per poèmes de Mario Benedetti, Francisco de Quevedo e Luís de Góngora, Mercè Rodoreda, Federico García Lorca, Rosemonde Gérard e Walt Whitman, entre d’auti.

Eth recitau a compdat damb pèces musicaus en cada capítol interpretades per musicians dera Escòla Musicau Val d’Aran.

Un an mès, eth Musèu dera Val d’Aran a compdat damb era collaboracion der Archiu Generau d’Aran, er airau de Politica Lingüistica deth Conselh Generau d’Aran e es bibliotèques municipaus de Vielha e Naut Aran entà celebrar eth Dia Internacionau dera Poesia.