Neo Sala a presentat aué en Conselh Generau d’Aran deuant dera conselhèra de Torisme e Desvolopament Economic dera Val d’Aran, Anna Díaz, deth president deth Grèmi d’Ostalaria dera Val d’Aran, Ambrós Barberà e as otelèrs e empresaris dera Val d’Aran eth projècte deth Doctor Music Festival, que se celebrarà en Escalarre (Pallars Sobirà) es dies 12, 13 e 14 de junhsèga deth 2019.

Sala a informat, qu’eth hestivau generarà un PIB de 6 milions d’èuros, chifra que represènte 5,8% deth totau deth PIB dera comarca pendent eth 2019. Er impacte economic totau serà d’uns 100 milions d’èuros.

Es dies anteriors e pendent eth hestivau trabalharàn en hestivau ues 3.000 persones entà dar responsa as besonhs des 60.000 espectadors que se demoren.

Era direccion deth hestivau a demanat era collaboracion des empresaris dera Val d’Aran entà daurir es sòns otèls pendent aguestes dates e poder acuélher es mès de 14.000 pernoctacions que se demoren deth 11 ath 14 de junhsèga deth 2019.

Pera sua part, era conselhèra de Torisme e Desvolopament Economic d’Aran Anna Diaz, a manifestat qu’ “era Val d’Aran vò collaborar actiuaments damb eth Hestivau a mès, coma destinacion toristica de prumèr orde, aufrirà toti es sòns mejans entà qu’era gent gaudisque dera ampla aufèrta toristica qu’aufrís era Val d’Aran”.

Eth president deth Grèmi d’Ostalaria dera Val d’Aran, Ambrós Barberà, “a arregraït ara organizacion deth Hestivau era confidança depositada enes establiments dera Val d’Aran, pr’amor qu’era projeccion internacionau serà fòrça importanta”.

Neo Sala a afirmat qu’auram un pannèu de naut nivèu coma enes darrèri hestivaus qu’aueren lòc en Escalarre e a confirmat que s’an venut mès de 2.000 abonatges. Es prumèrs interessadi son majoritàriaments en Catalonha, mès era organizacion vò atrèir public deth Sud de França pera proximitat deth territòri.

Tà mès informacion sus eth Doctor Music Festival: https://www.doctormusicfestival.com/

Vielha, 8 d’agost de 2018

Conselh Generau d’Aran: Núria Sanjuan