• Era Val d’Aran e era estacion d’esquí de Baqueira Beret an plaçat un igló ena Avenguda Diagonau de Barcelona (deuant eth Centre era Illa) entà dar a conéisher es nauetats dera tempsada d’iuèrn 2016-17.

 

 

Era Val d’Aran contunhe era campanha de promocion entara tempsada d’iuèrn 2016-17 en Barcelona damb era collaboracion dera estacion d’esquí aranesa, Baqueira Beret, entà hèr conéisher totes es prepauses de nhèu. Ager dijaus, 10 de noveme, Barcelona acuelhec era presentacion dera naua sason d’iuèrn dera Val d’Aran ena carpa/igló plaçada enquiad aguest dissabte ena Avenguda Diagonau de Barcelona (deuant eth Centre Comerciau dera Illa).

 

 

Era presentacion anèc a cargue deth sindic d’Aran, Carlos Barrera, dera conselhèra de Torisme e Desvolopament Economic d’Aran, Anna Díaz, deth director gerent de Baqueira Beret, Francis Coll, e deth director comerciau de Baqueira Beret, Xavi Ubeira.

 

 

“Baqueira Beret ei eth principau reclam de nhèu ena Val d’Aran e per açò era campanha ei conjunta, mès era Val d’Aran ei fòrça mès que nhèu, e aguesta campanha ei era melhor manèra de hè’c a conéisher” a comentat pendent era presentacion era conselhèra de Torisme e Desvolopament Economic d’Aran, Anna Diaz.

Díaz a ahijut “Volem arregraïr ar Ajuntament de Barcelona era sua collaboracion per deishar-mos plaçar er igló en un punt tan concorrut com ei era Diagonau deuant deth centre comerciau dera Illa”.

 

 

Pera sua part, Xavi Ubeira, director Comerciau de Baqueira Beret a manifestat: “Baqueira Beret encare era tempsada 16-17 damb melhores enes diferenti airaus entà enriquir e facilitar era experiéncia des esquiaires e snowboarders, tant en pistes coma dehòra d’eres. Eth remodelament de pistes amiades a tèrme eth passat ostiu some 1 km mès ath mapa de pistes abalisades entà un totau de 151 km mès es 5 km d’itineraris de montanha. Ath delà, s’a hijut ath còmput totau eth traçat d’Audi Ski Kronos que tant exit auec eth passat iuèrn. Damb aguesta ampliacion, Baqueira Beret passe a auer 104 pistes abalisades sense desbrembar eth vast domeni de freeride en un airau esquiable de 2.166ha. çò que represente ua aufèrta fòrça atractiua entà gaudir dera nauta montanha”.

Eth diuendres e dissabte a compdar des 14h00 e enquiàs 20h00 serà eth moment entà descorbir es naues pistes, zònes de léser, restaurants e experiéncies uniques qu’aufrissen Baqueira Beret e era Val d’Aran entara sason que lèu començarà.

Es 156 km de pistes qu’era estacion aranesa Baqueira Beret prepause aguest iuèrn daràn fòrça que parlar atau coma era sua ampla aufèrta d’après-ski.

 

 

Carpa/Igló Val d’Aran – Baqueira Beret
Avenguda Diagonau (deuant deth Centre Comerciau era Illa)
Barcelona
Oraris:
– Diuendres 11 e dissabte 12 de 12h00 a 20h00.

 

Baqueira Beret e era Val d’Aran en Let’s Snow BCN

Era presentacion ena ciutat comtau coïncidís damb era celebracion deth hestivau Let’s Snow BCN, que se celebrarà es dies 11, 12 e 13 de noveme en Pòble Espanhòu. Era Val d’Aran e Baqueira Beret seràn tanben presents en aguest concors que recupère era reünion annau de Barcelona damb era nhèu.

En paraules dera conselhèra de Torisme e Desvolopament Economic d’Aran, Anna Díaz: “Es visitants poderàn conéisher es diferentes prepauses de nhèu dera Val d’Aran, atau coma era aufèrta de lotjaments, restauracion e après-ski”.

Entre eth complèt e interessant programa d’activitats restacades damb er esquí e er espòrt de montanha, destaque era presentacion deth documentau sus eth freerider aranés, Aymar Navarro, “South Lines” eth dimenge 13 de noveme entàs 12h00.

 

 

 

 

Vielha, 11 de noveme de 2016

 

Conselh Generau d’Aran: Núria Sanjuan