Vielha, 23 de març de 2016.- Era Val de Aran viuec era darrèra dimenjada dus dies excepcionaus damb motiu dera finau dera Copa deth Mon de SBX en Baqueira Beret, qu’amassèc a esportistes e visitants de 20 païsi, qu’a estat avalorada fòrça positivaments per part des organizadors dera FIS e des responsables dera estacion d’esquí e deth pròpri Govèrn d’Aran, en tot demostrar un còp mès qu’era Val d’Aran e Baqueira Beret, aufrissen ues installacions e ues condicions de nhèu e de capacitat organizativa damb gatges qu’animen a contunhar en tot apostar per acuélher pròves esportiues de prumèr nivèu mondiau.

Eth sindic d’Aran Carlos Barrera, a volut soslinhar, “era capacitat des infrastructures deth País e era poténcia organizativa de Baqueira Beret entà acuélher pròves de prumèr nivèu internacionau d’espòrts d’iuèrn, coma ei ua finau dera Copa deth Mon de Snowboardcross e era oportunitat que represente entà dar a conéisher es possibilitats dera Val d’Aran en tot eth mon”.

Cau arrebrembar que pendent era dimenjada, sigueren mès de 5.000 es persones que gaudiren en dirècte der espectacle dera finau dera Copa deth Mon de SBX en Baqueira Beret, completada per ua magnifica aufèrta de productes gastronomics dera Val d’Aran coma era òlha aranesa, es productes dera marca de garantia dera Val d’Aran o era Biera aranesa.

E ara, comence ua Setmana Santa qu’aufrís era possibilitat as visitants de gaudir de totes es activitats qu’ei capaç d’aufrir un territòri coma er Aran, donques es condicions meteorologiques conviden per ua part a realizar activitats restacades damb er iuèrn, damb ues condicions des pistes de Baqueira Beret excellentes entara practica der esquí, e d’auta banda profitar eth bon temps entà realizar activitats ar aire liure en tot gaudir des paratges naturaus dera Val d’Aran e de tota era aufèrta complementària de torisme actiu entà toti.

Era Val d’Aran ac a tot. Activitats de nhèu, natura, aventura, cultura, tradicions, comèrç, gastronomia, sense desbrembar es activitats entàs mès petiti e entà tota era familha.

Baqueira Beret aufrís ua Setmana Santa damb fòrça nhèu e diversion.

Era estacion dera Val d’Aran aufrís aguesta Setmana Santa espessors d’enquia 235 cm e totes es installacions en foncionament qu’asseguren enquia 150 km de pistes daurides s’era meteorología ac permet.
Ath delà, era arribada dera primauera permet gaudir de Baqueira Beret e era Val d’Aran d’ua manèra desparièra. Aumenten es ores de solei e donques es possibilitats de descorbir activitats outdoor. Un moment ideau entà iniciar-se en quauque espòrt nau. Es sensacions deth telemark o er esquí de hons, era libertat der esquí de montanha o era tranquillitat des raquetes de nhèu. Setmana Santa ei ua bona epòca entà relaxà-se e descorbir espòrts naui.

Era estacion barrarà era sason eth dimenge 3 d’abriu.

Es burèus de torisme dera Val d’Aran, dispòsen de tota era informacion actualizada sus es pistes e accèssi dauridi entad aguesta Setmana Santa, damb era dubertura des pistes dera Artiga de Lin e de Bassa d’Oles, que permeten conéisher es cornèrs mès polidi der entorn naturau dera Val d’Aran damb excursions, ja siguen de senderisme o cicloturisme.
Damb era arribada dera primauera, tanben comence ena Val d’Aran ua naua sason d’espòrts d’aventura: rafting, hidrospeed o eth parc d’aventura Naturaran, son quauques des opcions entà tota era familha. Enterpreses coma DEPORTUR e CAMINS, aufrissen as visitants totes es activitats que poguen imaginar. Sense desbrembar es tres vies ferrates dera Val d’Aran damb desparièrs recorreguts e nivèus de dificultat: Via Ferrata de Les, Via Ferrata Poi d’Unha e Via Ferrata de Cledes de Les, aguesta darrèra recentaments inaugurada aguesta sason.

Es amants des tradicions de Setmana Santa poderàn gaudir des processions que se celèbren. Bossòst, ei er unic pòble que les a conservades de manèra autentica. An lòc eth diuendres Sant e eth dimenge de Pasca e s’an convertit en un element patrimoniau, de gran interès toristic e culturau. Arrebrembam que pendent aguesti dies aurà restriccions de circulacion ena N-230, damb motiu des processions. En Bossòst e tanben Arties, auràn ath delà mercat d’artesania pendent era Setmana Santa.

Pera sua part, Vielha, aufrís era sua aufèrta comerciau a on trobar eth moment entath shopping e gaudir de tota era aufèrta gastronomica des productes dera Marca de Garantia dera Val d’Aran, patès, embotits, caviar, licors, amassa damb es melhors prepauses des restaurants e es bars dera rota de pintxos.

Aran Park ja ei daurit

Entàs familhes, era Val d’Aran a activitats entà toti es gosti. Pendent aguesti dies, es mès petiti poderàn conéisher as ossi Ben e Lua e ath rèste d’animaus deth parc de fauna Aran Park, que dauric es sues pòrtes era darrèra dimenjada. Passar ua tarde en tot patinar en Palai de Gèu de Vielha, tanben ei ua bona alternatiua entàs activitats en familha, atau coma eth hestivau Pyrenades de Salardú que prepause activitats en familha en tot organizar desparièrs talhèrs infantils e un cors d’iniciacion ath montanhisme.
Es pòbles dera Val d’Aran, conserven veritables tresaurs culturaus e patrimoniaus. Cadun damb era sua glèisa de grana qualitat arquitectonica e pentures o conjunts escultorics en sòn interior, un legat artistic de grana varietat e excepcionau riquesa que se pòt descorbir a trauès des Rotes tematiques culturaus dera Val d’Aran.

Entara conselhèra de Torisme Anna Díaz, “ei dificil trobar d’aute lòc que pogue aufrir tanta diuersitat e tanta qualitat coma era Val d’Aran entà passar era Setmana Santa, mès en tot auer en compde qu’eth hèt qu’enguan era Setmana Santa sigue a finaus deth mes de març, hè qu’era estacion d’esquí de Baqueira Beret foncione a plea capacitat e qu’era Val d’Aran en sòn conjunt pogue aufrir prepauses que quinsevolhe persona pòt en eth trobar era sua activitat preferida”.

Era conselhèra Anna Díaz, harà era avaloracion dera aucupacion de Setmana Santa ena Val d’Aran eth pròplèu dimars dia 29 de març.