Era Val d’Aran poderà optar per prumèr còp as ajuts relacionadi damb era economia rurau que se pòden aplicar mejançant estrategies de desvolopament locau amiades a tèrme pes Grups d’Accion Locau que conformen es nomentadi ajuts LEADER.

Era prepausa de delimitacion des zònes ruraus deth LEADER tath 2014-2020 qu’a hèt public eth Departament d’Agricultura, Alimentacion e Medi Naturau dera Generalitat de Catalunya includís era totalitat des municipis dera Val d’Aran coma territòri LEADER, dempús des demanes efectuades des deth Conselh Generau d’Aran des de finaus deth 2011.

Era inclusion coma zòna LEADER dera totalitat des municipis dera Val d’Aran permeterà que se poguen accedir a ajuts entà, entre d’autes, aguestes accions:

– Mielhorar era qualitat de vida enes zònes ruraus.

– Fomentar era diversificacion economica der hilat empresariau, en tot preservar eth miei ambient e er entorn naturau.

– Accions de foment e desvolopament dera economia locau.

En paraules deth sindic d’Aran, Carlos Barrera, “aguest ei un resultat d’un trabalh de lèu 3 ans que serà fòrça beneficiós entara Val d’Aran, pr’amor que s’alongarà des d’ara enquiath 2020. Er enfòc LEADER se base en diuèrses àrees, ei public e privat, ei integrat e innovador, cooperatiu e implique er usatge dera creacion de hilats, per tant, serà fòrça positiu entà Aran”.

“Calerà establir, amassa damb es sectors economics implicadi, es estrategies de besonh que hèsquen d’aguesti ajuts un esturment util entath desvolopament economic dera Val d’Aran” a hijut eth conselhèr d’Agricultura, Ramaderia e Miei Naturau, Jose Enrique Arró.