• Es campings d’Aran tanben an aumentat era sua aucupacion en un 21,3% e era Oficina de Torisme de Vielha enguan a informat a 5.000 persones mès respècte er an passat.

Cada an, eth Departament de Torisme deth Conselh Generau d’Aran remasse es donades mensuaus d’aucupacion otelèra dera Val d’Aran entà poder hèr un balanç dera tempsada. En çò que portam d’ostiu, aguest mes de junhsèga, un 13% mès de visitants, s’an lotjat enes otèls dera Val d’Aran e enes campings un 21,3% mès.

Aguest aument ena arribada de toristes ath nòste territòri, ei frut der esfòrç des importantes campanhes de promocion enes diuèrsi canaus de comunicacion que s’an anat realizant peth Departament de Torisme deth Conselh Generau d’Aran e des otelèrs e des campings per complir es normatives sanitaries vigentes.

Es donades d’aguest mes, son superiores as deth 2020 e as deth 2019 en conjunt d’Aran, hèt que sauve relacion damb era celebracion de competicions e events qu’enguan s’an podut realizar ena nòsta Val. A estat gràcies as organizadors/es d’aguestes pròves, qu’an compdat damb eth finançament des administracions araneses, que mos a dat a conéisher coma un destin toristic d’ostiu damb ua gastronomia e uns servicis d’excellenta qualitat e ua grana diversitat ena aufèrta d’activitats relacionades damb era montanha.

Ath delà, era atencion personalizada qu’aufrís era Oficina de Torisme de Vielha a hèt qu’enguan 21.000 persones s’i apròpen tà obtier informacion sus aguestes activitat e endrets emblematics dera nòsta tèrra.

En aguest sens, segontes a afirmat eth conselhèr d’Economia, Torisme e Promocion Economica, Juan Antonio Serrano: “Era collaboracion e era ajuda des institucions publiques, a facilitat que se poguen realizar importantes pròves esportives e events pendent aguest mes de junhsèga, qu’an dinamizat e fomentat era arribada contunhada de visitants en Aran”.

Vielha, 4 d’agost de 2021