Vielha, 15 d’abriu de 2016 – Era Val d’Aran ei presenta a compdar d’aué enquiath dimenge 17 d’abriu ena hèira BTravel, er antic Salon Internacionau de Torisme en Catalonha, que se celèbre en recinte de Montjuïc de Fira de Barcelona.
En aguesta naua edicion participen lèu de 50 païsi de tot eth mon e compde damb mès de 200 expositors que presenten ua ampla aufèrta toristica dividida en 5 contorns; Prepauses en familha e escapades wellness, culturaus e istoriques, torisme de crompes e luxe, esportiues, ruraus e d’aventura e coma novetat en aguesta edicion, prepauses gastronomiques e enologiques.
Era participacion de Foment Torisme Val d’Aran en BTravel ei englobada ena sua estrategia de potenciacion deth torisme d’aventura, esportiu, rurau, e familhar, damb er objectiu de presentar e promòir totes es aufèrtes toristiques qu’a era Val d’Aran.
Era conselhèra de Torisme e desvolopament economic deth Conselh Generau d’Aran, Anna Díaz, a soslinhat que “Des de Foment Torisme Val d’Aran mos auem centrat en potenciar tota era nòsta aufèrta dehòra dera sason iuernau en tot èster presents en diuèrses hèires especializades en sector toristic familhar, esportiu e d’aventura”.
D’autra banda, era Val d’Aran tanben assistirà a eth “Mercat d’Escapades 2016”, deth 6 ath 8 de mai, organizat pera Agéncia Catalana de Torisme, ua hèira especializada en vacances familhars, natura, cultura e espòrts. Segontes destaque Díaz, “volem èster presents en hèires d’aguest sector e en tot aumentar era promocion ath public catalan qu’ei des mès importants que visite era Val d’Aran”.
