• Ena hèira se promoirà es productes e actes gastronomics deth territòri.

Deth 23 ath 25 d’octobre era Val d’Aran formarà part dera 6au edicion dera hèira “Mercat de Mercats” qu’aurà lòc ena Avenguda dera Catedrala de Barcelona (Barri de Ciutat Vella). Se tracte d’un eveniment dirigit a promòir es productes e era gastronomia de diferentes parts de Catalonha.

Era Val d’Aran participarà coma collaborador en tot promòir era gastronomia aranesa. Atau, se veneràn es productes deth territòri includidi es deth sagèth Productes dera Marca de Garantia, ath delà de promòir era restauracion e es actes gastronomics que se realizen ath long der an: Mòstra Gastronomica dera Codina Aranesa, Era Mongetada e Era Òlhada.

Mercat de Mercats includís diferentes activitats en un unic espaci dirigit a productors, comerçants e codinèrs e permet apropar as ciutadans de manèra ludica e pedagogica çò de melhor deth producte de mercat. Pendent era edicion der an passat, mès de 260.000 persones visitèren era hèira e se veneren mès de 55.000 tiquets de degustacion.

“Aguest eveniment permet promòir era gastronomia dera Val d’Aran, que demòstre era importància d’aguesti sectors ath territòri. Mercat de Mercats ei eth scenari perfècte entà hèr conéisher aguesti elements dera identitat aranesa, e que cada an atrè a ua grana chifra de visitants”, comente era conselhèra de Torisme e Desvolopament Econòmic d’Aran, Anna Diaz.