• Ena hèira se promoirà es productes e actes gastronomics deth territòri.

Deth 21 ath 23 d’octobre era Val d’Aran formarà part dera 9au edicion dera hèira “Mercat de Mercats” qu’aurà lòc ena Avenguda dera Catedrala de Barcelona (Barri de Ciutat Vella). Se tracte d’un eveniment dirigit a promòir es productes e era gastronomia de Catalonha.

Era Val d’Aran participarà coma collaborador en tot promòir era gastronomia aranesa. Atau, se veneràn es productes deth territòri includidi es deth sagèth Productes dera Marca de Garantia Val d’Aran, ath delà de promòir era restauracion e es actes gastronomics que se realizen ath long der an. Era Escòla d’Ostalaria de Les- Val d’Aran elaborarà diuèrsi plats damb productes dera Marca.

“Mercat de Mercats” includís diferentes activitats en un unic espaci dirigit a productors, comerçants e codinèrs e permet apropar as ciutadans de manèra ludica e pedagogica eth melhor deth producte de mercat. Damb mès de 70 stands se demore era assisténcia de mès de 260.000 persones.

“Aguest eveniment permet promòir era gastronomia dera Val d’Aran, que demòstre era importància d’aguest sector ath territòri. Mercat de Mercats, que cada an atrè a ua grana chifra de visitantes, ei eth scenari perfècte entà hèr conéisher aguesti elements dera identitat aranesa”, comente era conselhèra de Torisme e Desvolopament Econòmic d’Aran, Anna Diaz.

Vielha, 21 d’octobre de 2016

Conselh Generau d’Aran: Núria Sanjuan