Vielha 10 de hereuèr de 2016.- Un an mès e ja son ueit consecutius, Torisme Val d’Aran a estat presenta en IMTM (International Mediterranean Tourism Market) de Tel Aviv en Israèl, qu’enguan a celebrat era 22au edicion.
Era preséncia dera Val d’Aran, en stand de Catalonha jos era mèrca Pirenèus, a servit un còp mès entà hèr promocion dirècta dera aufèrta toristica d’ostiu dera Val d’Aran, que dempús de toti aguesti ans ja ei pleaments consolidada entre es toristes israeliani que cada ostiu mos visiten.
Er objectiu d’enguan, segontes era conselhèra de Torisme e Desvolopament Economic deth Conselh Generau d’Aran, Anna Díaz, ei qu’“un còp artenhut qu’es toristes d’aguesta zòna deth mediterranèu mos visiten en ostiu, ara cau arténher que coneishen tanben tot acrò que les pòt aufrir era Val d’Aran en iuèrn, qu’ei fòrça e fòrça diuèrs. Per açò enguan ena visita organizada per Torisme Val d’Aran auem volut que participe tanben Baqueira Beret, donques qu’atau es operadors israeliani poderàn conéisher de prumèra man era aufèrta iuernau dera Val d’Aran en sòn conjunt”.
Es responsables de Baqueira Beret e de Torisme Val d’Aran, ath delà deth contacte dirècte damb eth client mejançant eth stand e des amassades personalizades damb es operadors, an mantengut contacte damb diuèrsi jornalistes de mejans de comunicacion israeliana entà que agen informacion dera Val d’Aran e la poguen transméter enes sòns mejans.
Pendent eth sojorn en IMTM, Anna Díaz e Xavier Ubeira, director comerciau de Baqueira Beret, participèren en acte de presentacion de Catalonha ena hèira organizada per Tourspain, que compdèc damb era assisténcia der ambaishador d’Espanha en Tel Aviv, Fernando Carderera Soler.
