Vielha, 19 d’octobre de 2018.- Es productes dera Mèrca de Garantia dera Val d’Aran, eth restaurant Urtau e eth Caviar Nacarii seràn es representants destacadi dera gastronomia aranesa ena 9au edicion dera Hèira Mercat de Mercats, era grana hèsta deth producte e dera gastronomia, que se celèbre era dimenjada deth 19 ara 21 d’octobre ena Avenguda dera Catedrau de Barcelona.

Proximitat, reaprofitament e sostenibilitat son es èishi principaus dera Hèira Mercat de Mercats 2018 ena que, coma cada an, tornarà a aparéisher eth melhor producte des mercats mejançant degustacions e ponéncies interessantes sus reaprofitaments alimentari e agricultura ecologica.

Es visitants ara Hèira Mercat de Mercats poderàn aquerir es productes deth sagèth “Productes dera Mèrca de Garantia Val d’Aran”, e ath delà gaudir des tastets de Sopa Barrejada, de Civet de sanglièr  e era Mousse de hormatge damb confitura de cassis qu’aufrirà eth restaurant Urtau. Eth dimenge 21 pera tarde, entre es 16 e es 16:45 ores Caviar Nacarii aufrirà un tast de caviar dera Val d’Aran ena aula de Mercat de Mercats a on era interaccion entre producte e visitants s’intensifique.

Mercat de Mercats includís diferentes activitats en un unic espaci damb preséncia de productors, comerçants e codinèrs que permet apropar as ciutadans de manèra ludica e pedagogica çò de melhor des productes des mercats, e a on se demore era assisténcia de mès de 260.000 persones.

Er orari dera Hèira Mercat de Mercats ei: diuendres 19 e dissabte 20 de 11 a 22 ores; e dimenge 21 de 11 a 21 ores.