• Eth Conselh Generau d’Aran  a signat per prumèr còp un contracte damb era empresa Pirineos Drone Aviation entara prestacion de servicis de transpòrt aerian de cargues d’enquia 100 kg, coma ua pròva pilòt entà estudiar eth desvolopament d’aguest tipe de tecnologia en nòste territòri.

• Pirineos Drone Aviation ei ua empresa neishuda en Aran en 2021 e vinculada ath Hub d’Innovacion Rurau HèPic, que d’alavetz ençà a experimentat un important desvolopament en tot esdevier un referent ena matèria.

Eth govèrn d’Aran a coma un des sòns objectius eth desvolopament dera innovacion entà impulsar accions que permeten era diversificacion deth modèl economic, en tot crear oportunitats e retorn economic a compdar des rèptes actuaus. Aguest ei eth trabalh que s’amie a tèrme a trauès deth Hub d’Innovacion Territoriau, HèPic, qu’abòrde projèctes basadi ena innovacion toristica, espòrts, servicis tàs persones, energia e ramaderia, entre d’auti.

Enes zònes ruraus de montanha, eth transpòrt de mercaderies supòse tot un rèpte pr’amor dera pròpria orografia deth territòri. Ei per açò, qu’eth govèrn d’Aran ven de signar un contracte de servicis coma pròva pilòt entà facilitar era logistica en Aran, en tot èster ath capdauant d’aguesta naua èra deth transpòrt damb drons pr’amor des importants beneficis que compòrten, sustot entàs endrets mès luenhans e isoladi.

Era empresa Pirineos Drone Aviation forme part des Centres d’Innovacion entara logistica e Transpòrt de Mercaderies (CITET), en tot complir damb es nauti requisits entà garantir era seguretat e legalitat des diuèrsi servicis damb aguestes aeronaus.   Atau madeish, compde damb eth modèl de dron Flying Basket FB3 qu’a ua capacitat de carga entà 100 kg, que li permet realizar servicis de transpòrt aerian inferior a 100 kg.

Eth propòsit d’aguest pilòt ei implementar aguesta tecnologia entath montatge d’infrastructures de telecomunicacions en entorns de dificil accès, balhar supòrt ara ramaderia extensiva optimizant era logistica rurau e facilitar er aprovediment des refugis de montanha en tot milhorar era eficiéncia enes forniments.

Entath vicesindic dusau, e conselhèr d’innovacion, Oriol Sala: “Auer ligams e contactes damb especialistes en naues tecnologies e investigacion coma son es professionaus de Pirineos Drone, o dera Fundació i2cat, damb es que trabalham entara implementacion en Aran dera airau 5G, ei ua grana auantatja entà qu’es empreses araneses poguen créisher”.

Aguesta pròva pilòt permeterà dar era oportunitat a empreses deth territòri, qu’invertissen en projèctes innovadors, testejar productes, servicis e equipaments en tot dar-les impuls, a mès de generar coneishement ena Val d’Aran qu’ajude ath desvolopament socioeconomic e ara creacion de lòcs de trabalh qualificadi.

Era sindica d’Aran, Maria Vergés, a destacat que: “Compdar en nòste territòri damb ua empresa coma ei Pirineos Drone Aviation, mos permet testejar aguesta tecnologia en prumèra persona entà poder dar solucion a fòrça problèmes de transpòrt presenti en dia a dia des territòris de montanha”.

Vielha, 14 d’abriu de 2025.