• Baqueira Beret encare era Setmana Santa damb espessors de mès de 3 mètres, 146 km de pistes dubèrtes e totes es installacions en foncionament.

• Setmana deth Caviar, ueit restaurants aranesi presenten menus damb eth caviar que s’elabòre ena Val d’Aran.

• Aran Park, eth parc de fauna de Bossòst inaugure era sason era Setmana Santa.

• Bossòst era Setmana Santa mès tradicionau.

Foto: Núria Sanjuan

Era Val d’Aran aufrís as visitants diuèrses possibilitats entà Setmana Santa. Ath delà des atractius abituaus, era impressionanta natura e eth gran valor deth patrimòni aranés, pendent era pasca es visitants trobaràn ua grana diuersitat d’activitats adequades entà diferenti segments de toristes.

Baqueira Beret arribe a Setmana Santa damb espessors de mès de 3 mètres e 146 Km de pistes dubèrtes.

Era estacion aranesa gaudís d’ues immilhorables condicions entara practica der esquí e surf de nhèu totes es installacions en plen foncionament, 146 Km de pistes dubèrtes e mès de 3 mètres de nhèu, ua situacion que permeterà as visitants qu’arriben entara val, passar ues bones vacances de pasca. Era quantitat e era qualitat dera nhèu a motivat qu’es responsables de Baqueira Beret agen decidit agranir era sason enquiath 12 d’abriu. A compdar deth 7 d’abriu se dauriràn 69 Km de pistes enes sectors de Baqueira e Bonaigua damb un forfait a 35€ entàs adults e 25€ er infantil.

5au edicion deth Festivau Pyrenades

Deth 28 de març ath 4 d’abriu se celèbre en Salardú era 5au edicion deth Festivau Pyrenades, ua iniciatiua ena quau collaboren eth Conselh Generau d’Aran e Torisme Val d’Aran. Er ample programa d’activitats includís caminades, conferéncies, projeccions, musica e exposicions, Pyrenades ei ua bona alternatiua entàs visitants dera val en Setmana Santa.

Setmana deth Caviar ena Val d’Aran deth 27 de març ath 6 d’abriu

Ueit restaurants aranesi an previst sorpréner as sòns clients damb menus enes quaus eth caviar serà eth protagonista. Era Setmana deth Caviar a coma intencion potenciar aguest producte que s’elabòre ena val a compdar der an 1999 e qu’a ja obtengut era reconeishença de codinèrs e gastrònoms. Es menus van des 30€ as 55€.

Es restaurants que participen son: Restaurante Casa Antonio, Restaurant Era Coquèla, Restaurant Era Lucana d’Aran, Restaurant Era Mola, Restaurant Er Occitan, Restaurant Es Arraitzes, Restaurant Hotel Tuca, Restaurant Pirineu Gourmet Degustación.

Era piscifactoria de Caviar Nacari se tròbe en arriu Garona, en municipi de Les. Era qualitat e era puresa dera aigua, que proven deth desglaç, hè que s’obtengue un caviar fresc d’excellenta qualitat. Eth procès entara sua elaboracion ei artesanau e se base en metòdes tradicionaus.

Aran Park inaugure sason en Setmana Santa

En Pòrt de Portilhon, en tèrme municipau de Bossòst se tròbe Aran Park, parc de fauna qu’inaugure era sason eth pròplèu dia 28 de març. Eth sòn entorn de natura sauvatja a convertit aguest espaci en un bon lòc entà descorbir era fauna e era biodiversitat des montanhes d’Aran.

Se pòden observar en semilibertat ossi, gatilops, lops blanqui e grisi, marmòtes, e cèrvis entre d’auti.

Aran Park ei ua activitat recomanable entàs familhes mès tanben entà quinsevolh persona que sigue amant dera natura. Eth recorregut pes installacions deth parc a ua durada aproximada d’ua ora e mieja e non requerís d’ua grana preparacion fisica.

Ath delà des passes annaus, es prètzi entad aguesta sason son: adults 14€ e era entrada infantila 9€, ath delà i a passes familhaus e prètzi especiaus entà jubilats.

Era Setmana Santa mès tradicionau

En Bossòst poblacion plaçada a 710 mètres d’altitud ath nòrd-oèst d’Aran, se viu era Setmana Santa intensaments, de hèt, es processions d’aguesta poblacion son es uniques que i a ena val. Era prumèra senhau qu’anóncie era proximitat dera Setmana Santa ei era cobertura deth prebisteri dera glèisa romanica dera Purificacion de María, se corbís damb teles pintades des sègles XVI/XVII que mòstren scènes deth Sant Sopar, era Passion e era Resurreccion. Eth diuendres Sant Viacrucis, participen es Armadi, es Nazarens, eth Cirineu, Veronica e d’auti personatges biblics. Un còp finalizat eth Viacrucis aucupe es carrèrs de Bossòst era procession deth Sant Enterrament, a on ges eth pas deth Sepulcre, que represente er enterrament de Jesus, es passi deth Nazareno e era Pietat e era Dolorosa. Aguesta procession se celèbre des deth 1879. Coma “colofó” des actes dera Setmana Santa ei era procession dera Amassada ena quau s’escenifique era amassada entre Jesus e Maria dempús dera Resurreccion.