• “Barcelona Degusta” apròpe era nauta gastronomia as incondicionaus dera alimentacion de qualitat.

• Era Hèira reünirà 10 esteles Michelin en ua cita gastronomica que compdarà damb talhèrs, corsi, conferéncies, “catas” e projeccions cinematografiques.

• Eth certamen amasse a petiti productors, artesans e granes marques deth sector.

Deth 24 ath 27 d’octobre era Val d’Aran participarà en “Barcelona Degusta” era hèira que debanarà ena Hèira de Barcelona, recinte de Montjuic. Se tracte d’un eveniment dirigit a apropar er univèrs gastronomic a toti es publics aficionadi ara alimentacion de qualitat.

Era Val d’Aran participarà ena hèira en tot promòir era gastronomia aranesa. Atau, se mostraràn e se poderàn degustar es productes deth territòri includidi es deth sagèth “Productes dera Marca de Garantia”, ath delà de promòir era restauracion e es actes gastronomics que se realizen ath long der an: Mòstra Gastronomica dera Codina Aranesa, Era Mongetada e Era Òlhada.

“Barcelona Degusta” includís diferentes activitats dirigides a tot eth public damb era preséncia de codinèrs de prumèr nivèu com: Joan Roca (Celler de Can Roca), Carme Ruscalleda (Sant Pau), Fermí Puig, Nandu Jubany (Can Jubany), Sergio e Javier Torres (Dos Cielos), Carles Gaig (Restaurante Gaig), Carles Abellan (Bravo) e Ada Parellada (Semproniana); mèstres pastissers coma Christian Escribà e David Pallàs; e expèrts coma David Escofet (Tastavins) e Daniel Jordan (Planes Creativos). Enquia 10 esteles Michelin passaràn peth Salon entà experimentar damb es sues creacions.

“Barcelona Degusta ei eth scenari perfècte entà hèr conéisher era gastronomia e es productes dera identitat aranesa pr’amor que cada an atrè a ua grana chifra de visitants”, a comentat era conselhèra de Torisme e Desvolopament Economic d’Aran, Anna Diaz.