Vielha, 20 d’abriu de 2018.- Era Val d’Aran participe un an mès des d’aué e enquiath dimenge 22 d’abriu ena hèira B-Travel, er antic Salon Internacionau de Torisme de Catalonha, que se celèbre en palai 8 deth recinte de Montjuïc de Fira de Barcelona.

En aguesta naua edicion participen 200 expositors provenenti de mès de 40 païsi de tot eth mon que presenten ua ampla aufèrta toristica.

Entre es novetats que presente enguan eth salon especializat en torisme d’experiéncies, destaque era creacion deth nau espaci entà professionaus B-Travel Pro, qu’es organizadors an impulsat damb era Mobile World Capital de Barcelona, entà fomentar eth debat sus innovacion e tendéncies tecnologiques aplicades ara industria toristica.

Era participacion de Foment Torisme Val d’Aran en B-Travel ei englobada ena sua estrategia de potenciacion deth torisme d’aventura, esportiu, rurau, e familhau, damb er objectiu de presentar e promòir totes es aufèrtes toristiques qu’a era Val d’Aran.

Era conselhèra de Torisme e Desvolopament Economic d’Aran, Anna Díaz, soslinhèc qu’aguesta edicion der eveniment internacionau de torisme mès important de Catalonha ei un bon moment entà dar a conéisher es naues iniciatiues de Torisme Val d’Aran en segment deth torisme familhau, esportiu e d’aventura, atau coma era cada viatge mès importanta aufèrta de torisme culturau e d’auviatge istoric qu’aufrís era Val d’Aran as visitants pendent tot er an.