• En aguestes jornades, celebrades era passada setmana en Ponferrada, eth Conselh Generau d’Aran e Arantec presentèren ena Taula de Innovacion e Tecnologia eth projècte de cobertura LORA, un projècte locau que neishec entà poder implementar, de forma transversau en toti es sectors economics, es procèssi de digitalizacion de besonh entà esdevier ua destinacion intelligenta e generar un marc d’oportunitats a nivèu tecnologic e, qu’a dia d’aué, s’a convertit en un cas d’exit que s’expòrte a d’auti territòris

Era passada setmana, eth conselhèr de Gestion Ambientau, Transicion Energetica e Innovacion, Oriol Sala, amassa damb tecnics deth Conselh Generau d’Aran e representants d’Arantec, sigueren presents enes Jornades der Hilat de Centres de Innovacion Territoriau organizades pera secretaria generau entath Rèpte Demografic, deth Ministèri de Transicion Ecologica e Rèpte Demografic, en Ponferrada. A on sigueren presents, entre d’autes persones, era ministra de MITECO, Teresa Ribera, e eth secretari generau entath Rèpte Demografic, Paco Boya.

Aguestes jornades acuelheren autant taules redones a on se tractèren aspèctes clau entath desvolopament territoriau, coma ua hèira de casi d’èxit de projèctes innovadors autant publics coma privats.

En cas dera Val d’Aran, se participèc ena Taula de Innovacion e Tecnologia, a on se presentèc eth projècte der hilat LORA. Un projècte que nèish ena Val d’Aran damb er objectiu de dotar de cobertura LORA a zònes a on non i auie cobertura entà poder implementar, de forma transversau en toti es sectors economics, es procèssi de digitalizacion de besonh entà esdevier ua destinacion intelligenta e generar un marc d’oportunitats a nivèu tecnologic. Ua solucion locau qu’ei dejà un cas d’exit e que s’expòrte a d’auti territòris a trauès deth coneishement e talent aranés.