• Era sindica d’Aran, Maria Vergés, amassa damb es conselhèrs Amador Marqués e Josep Canut, e diuèrsi tecnics/es der airau de Torisme deth Conselh Generau d’Aran, son presents aguesti dies ena Hèira Internacionau de Torisme en Madrid, en tot promocionar Aran coma destinacion qu’apòste e trabalhe ena sostenibilitat e eth suenh as nòstes montanhes e ara nòsta singularitat e cultura

Era Hèira Internacionau de Torisme de Madrid (FITUR) se celèbre enguan entre es dies 24 e 28 de gèr, e era sindica d’Aran, Maria Vergés, es conselhèrs de Governacion, Innovacion, Economia e Torisme, Amador Marqués, e Promocion Economica, Comèrç e Mobilitat, Josep Canut, e diuèrsi tecnics e tecniques deth departament de Torisme deth Conselh Generau d’Aran son presents en aguest eveniment de referéncia en sector internacionau deth torisme.

“Era Val d’Aran a estat present en FITUR en totes es sues edicions e entà nosati supause ua oportunitat fòrça important de poder promocionar eth nòste territòri de cara a naui mercats internacionaus e meter-mos en contacte damb eri entà cercar recorsi e èster presents en mès païsi”, afirmaue eth vicesindic e conselhèr Marqués.

Pera sua part, era sindica d’Aran destacaue que: “eth compromís deth govèrn deth d’Aran ei auançar enquia un torisme sostenible e respectuós damb eth nòste territòri”, e higie que: “a trauès deth nòste Plan de Sostenibilitat Toristica, trabalham en ahèrs tant importants coma era mobilitat sostenible, eth contròl d’accèssi, era desestacionalizacion e diversificacion dera aufèrta toristica e era implementacion des naues tecnologies entà auançar enquia ua destinacion intelligenta”.

“En aguesta eveniment, volem dar a conéisher era nòsta destinacion, mès tanben eth nòste comèrç, gastronomia e es servicis que placen ara Val d’Aran coma un territòri de referéncia”, higie eth conselhèr Canut.