• Era estacion d’esquí aranesa de Baqueira Beret a mercat uns circuits entara practica der esquí de montanha ar entorn dera sua estacion.
• Gràcies ara collaboracion entre eth Conselh Generau d’Aran e er Ajuntament de Naut Aran era seleccion dera equipa nacionau de montanha a pogut gaudir aguesta setmana d’aguesti circuits.
Aué dimèrcles, 16 de deseme, s’an presentat ena sedença deth Conselh Generau d’Aran es circuits d’esquí de montanha dera Val d’Aran e era equipa dera seleccion nacionau d’esquí de montanha. Er acte a compdat damb era preséncia deth sindic d’Aran, Carlos Barrera, dera conselhèra de Torisme e Desvolopament Economic d’Aran, Anna Díaz, deth vicesindic d’Aran e conselhèr d’Espòrts, Luis Carlos Medina, deth director comerciau de Baqueira Beret, Xavi Ubeira, deth director de montanha de Baqueira Beret, Jordi Cardona, deth tecnic responsable deth Centre de Lauegi d’Aran, Jordi Gavaldà, deth seleccionador dera equipa nacionau d’esquí de montanha, Oriol Duixans, ath delà des tecnics e es membres dera equipa dera seleccion nacionau d’esquí de montanha.
Es circuits d’esquí de montanha son:
AIRAU DE BERET:
– Circuit Molins: Damb origina en madeish Plan de Beret (Còta 1.850m) e en parallel pera part extèrna dera Pista de Molins (Còta 2.200m).
Longitud: 2.354m
Desnivèu: 350m
– Circuit Barlongueta: Damb origina en Parcatge de Beret, en parallel pera part exteriora dera Pista Barlongueta enquiara Còta 2.338m.
Longitud: 2.786m
Desnivèu: 488m
– Circuit Crono Salomon/ Ticolet de Dossau: Concebut coma un circuit d’entrenament tecnic. Damb origina en Plan de Beret en parallel pera part exteriora des Pistes de Cabanes e Ticolet enquiara Còta 2.515m deth Tuc Dossau. Se crearà un classament de sason mejançant contraròtle damb eth sistèma Sportident. Ara fin dera sason se premiarà es 3 melhors tempsi.
Longitud: 2.967m
Desnivèu: 670m
AIRAU D’ORRI:
– Circuit Tuc deth Rosari e Tuc de Baciver: Circuit de nauta montanha entà esquiaires experimentadi. Damb origina en parcatge d’Orri, per un suenhat paratge enquiath Tuc deth Rosari (Còta 2.594m) o enquiath Tuc de Baciver (Còta 2.644m).
Desnivèu: Tuc deth Rosari 744m
Tuc de Baciver 794m
AIRAU BONAIGUA:
– Circuit Muntanyó: Damb origina en Restaurant deth Cap deth Pòrt en parallel ara pista Bonaigua, pera sua part extèrna, enquiara Còta 2.510m.
Longitud: 2.600m
Desnivèu: 438m
Eth director de montanha de Baqueira Beret, Jordi Cardona, a manifestat “er esquí de montanha ei un des espòrts que permet accedir as cornèrs mès polidi dera Val d’Aran, e encara qu’en principi se concep coma un espòrt qu’era sua practica s’amie a tèrme ena montanha sauvatja non condicionada, aguesti circuits an un doble objectiu: iniciar as esquiaires coma pas enquia aquerir era experiéncia e seguretat sufisenta entà gésser ena montanha”.
Era conselhèra de Torisme e Promocion Economica d’Aran, Anna Díaz, a soslinhat “era Val d’Aran a eth privilègi de compdar damb un hilat de refugis entà acuélher as esquiadors”.
Ara seguida dera presentacion des circuits d’esquí de montanha dera Val d’Aran/ Baqueira Beret, s’a realizat era presentacion dera equipa nacionau d’esquí de montanha, damb era preséncia de:
Sr. Oriol Duixans, seleccionaire e manager dera seleccion
Tecnics:
– Àlex Masdeu
– Gerard Garreta
– Fernando Rosa
– Jordi Canals
– Maria Salazar
Esportistes:
– Kilian Jornet
– Marc Pinsach
– Miguel Caballero
– Antonio Alcalde
– Marta Garcia
– Marta Riba
– Claudia Galicia
– Mireia Miró
– Nahia Quincoces
– Laura Orgué
Oriol Duixans, seleccionador dera equipa nacionau d’esquí de montanha, a mostrat eth sòn arregraïment ara Val d’Aran pera acuelhuda e a soslinhat eth gran trabalh dera estacion d’esquí de Baqueira Beret pera pedagogia qu’amie a tèrme entà poder entrar ena montanha damb fòrça mès seguretat.
Eth sindic d’Aran, Carlos Barrera, a manifestat “ei un aunor entara Val d’Aran poder compdar damb era preséncia dera equipa nacionau d’esquí de montanha” e a arregraït tanben eth trabalh de Baqueira Beret.
Barrera a hijut qu’ “era Val d’Aran compde damb un centre de lauegi que garantís era seguretat as persones ath delà d’un servici d’emergéncies (Pompièrs d’Aran) de prumèr nivèu”.
Huelheton des rotes d’esquí de montanha:AAFF_Triptic_Montanya_BB2015_03
#skimoFedmeValdAran
@baqueira_beret
@conselharan
@esqui_fedme
@ValdAran